يومياتي في المشرحة ...

السلام عليكم ورحمة الله وبركاته

من تانى باقولك يا دكتور انى فعلا مش باستغرب لما تتكلم عن المشرحة لان دى حياتك وتقريبا معظم الخبرة اللى بتاخدها ف شغلك بتكون من دراستك للجثث دراسة وافيه وبالتالى فالمشرحة تعتبر منبع رئيسى لمنبع علمك المستقبلى


بصراحة انا اول ما كلمة مشرحة بترن فى ودنى بافتكر فيلم كده كان فيه طلبه الطب بيتخانقوا على الجثث ولما يسمعوا ان فيه جثة يهللوا زى مايكونوا طالعين رحله


مع انى اعتقد دون خبرة حقيقة ان الموقف مهيب جدا بس يظهر ان الموضوع بيتحول لمساله تعود
ومش عارفة بجد اذا كان مرعب ولالا لان مرة حد قالى ان الجثث من الفورمالين والدم المتجلط مش بتدى ايحاء الجثة طول ما انت مش كاشف وشها طبعا

يعنى لو حد زى حالاتى اقصى منظر دم بالنسبه له نقطة الدم اللى بتتاخد عشان نوع الفصيله
ومش بيعرف يشوف دم لا ادمى ولا غير بالنسبه له فكرة الجثة دى ممكن تكون اقل رعبا لان الموضوع بيبقى اشبه بالعرايس مع العلم تانى ان كل ده كلام نظرى لانى الحمد لله لسه ما اتشرفتش بلقاء جثة


بس فعلا السؤال اللى انا بافكر فيه ولما قريت الخاطرة كان فى ذهنى

ليه احنا بنخاف من الجثث ؟

رغم اننا لو بصينا لها فى اطار موضوعى هنلاقى مفيش اى مجال للخوف وخاصة الخوف اللى بيوصل لدرجة احلام وجثث بتقوم وحاجات كده اصلا انت متاكد انها مش هتحصل

هل هى رهبة الموت ؟ وفكرة انك تحط نفسك ف الموقف ده

بس انت ممكن تتخيل رهبه الموت دى ف حاجات كتير قوى بس برده حسب اللى سمعته ان الجثة من كتر الفورمالين مش بتدى انطباع الجثة اصلا

ولا ده مجرد رد فعل طبيعى زى اى حد ممكن يتخض لو حد طلع له ف الضلمة وخضه خاصة لو كان لسه متفرج على فيلم رعب طازة ولا حاجة

بجد مش عارفة ويجوز يكون كل ده مع بعضة


وموضوع الفيديو ده اللى اعتقد انه مالوش معنى ده لو ماكانش متركب اصلا ففى حاجلت كتير قوى مالهاش لازمة ولامعنى فى الحاجات اللى بنشوفها اشمعنى ده اللى هنسال عليه
ده غير انى اعتقد والله اعلم ان اللى جاء به بغض النظر هو عبارة عن ايه حرام لانه تمثيل بشكل مقزز للجثة خاصة انى ما اعتقدش ان اللى عمله كان هدفه هو العلم وانما كان هدفه اللى حصل بالظبط مجرد انه انتشر والفيديو اتعرف مع انى برده مش شايفة ف ده اى استفاده

اما موضوع التوصيه ده فانا هاقولك حاجة بسيطة

لما الناس توافق ان اعضاءها بعد الموت يستخدم لاحياء مريض اخر ف حاجة للعضو ده نبقى ندور على متبرعين لكليات الطب ده غير دخول الجثه لمشرحة بيبقى فضيحة ف حق الجثة

بس انت لو عاوزنى اكلمك بصراحة انا ما اعتقدش انى هاوافق انى ادخل مشرحة بعد موتى حتى لو ف سبيل العلم انا ممكن اعمل موضوع التبرع لحد محتاج بس المشرحة دى الحقيقة انى ما اتمنهاش

لانى ما اعتقدش انى هابقى مبسوطة وانا سوءاتى معروضة على الملا حتى لو كان الهدف هو الطب

ده غير انى معترضة اصلا على فكرة الجثة لانى اعتقد اننا وصلنا لمرحله من التقدم تاهلنا اننا نوجد بدائل لان اكيد اللى مش هارضاه على نفسى مش هارضاه على غيرى


مشكور جدا يا دكتور على الموضوع ده وبجد يكفى كم الانفعلات اللى بتحصل لاى حد اول ما يسمع لفظ مشرحة فقط فمابالك بيوميات سائح دائم ف مشرحة اعتقد انه هيكون موضوع ثرى انت حتى ممكن تعمله سلسلة وممكن تعمل زى ما دنيا حبيبتى قال ان ممكن تضمنه بمعلومات بسيطة وبالفاظ متواضعة لو سمحت بلاش الفاظ خنفوشوريه عشان بس الموضوع يوصل


ومعلش طولت عليك كالعاده


تقبل مرورى وفائق احترامى



السلام عليكم ورحمة الله وبركاته

الأخت أيه .. اشكر ليكي تعليقك و رأيك اللي اعتقد إنك نجحتي كعادتك بتوصيله بشكل هادئ و متزن و بالطبع أنا معاك إن الجثة بتكون محفوظة و متغيره و ما بتكونش واحد ميت كده .. و بعدين بتكون متقطعه .. يعني لولا إنك عارفه إنها مشرحه كان ممكن تفتكري حتت اللحمه ديه مش لإنسان .. بس برضه الهيبة و خصوصاً لأول مرة و إن الواحد في باله إن الإنسان ده كان في يوم ماشي في وسطنا و بياكل و يشرب زيينا .. أما عن حكاية السوئات فديه فعلاً شيء سيء جداً .. و بالمناسبة حصلت ليه مرة و أنا في المشرحه رحت ناحية السبيسمن اللي مخصصة لسنة ثالثة و هما بيدرسوا في الوحدة الخامسة الجهاز التناسلي .. و بالفعل شعرت كم هو مأساوي أن تكشف عورة الإنسان هكذا لمئات الطلاب و الدكاتره ليدرسوا و يعبثوا و يستظرفوا فيها .. بصراحة معاكي حق ...

و برضه عند جهينة الخبر اليقين .. تقبلي تحياتي

انا ايه اللى دخلنى هنا اصلا انا بخاف من المشرحة اقوم ادخل يوميات عمو هيزن فى المشرحة
طيب افرض النور قطع عليا دلوقتى وانا فى الموضوع هعمل ايه وهتصرف ازاى

عارف ايه اللى دخلنى الموضوع فكرنى بحكاية لذيذة قووووووووى حصلت لى وانا صغيرة
لا مش صغيرة قوووووووى كده كنت اكبر من كده شوية يعنى كنت فى اولى او تانية ابتدائى وابن عمتى الكبير كان فى طب وكانوا لسه برضه ايامها مش منتشرة قوى موضوع الجثث البلاستيك دى فطلب من بابا باعتبار انه خاله يشوف له حتة جمجمة كده يدرب عليها فبابا كان ليه واحد صاحبه ابنه فى طب وعنده جمجمة حلوة كده ابنه بيتعلم عليها فبابا الله يكرمه جابها عندنا البيت هتقعد معانا شوية لحد ما نروح زيارة لعمتى وناخد لها الجمجمة معانا طبعا انا شفتها يومها مختفش قوى معرفش ليه وانا صغيرة مكنتش بخاف قوى بعكس لما كبرت طبعا دلوقتى بترعب لو النور طفا عليا وانا لوحدى فى البيت ما علينا حددنا ميعاد زيارة لعمتى وخدنا بعضنا زى الشطار كده علشان نروح لها واحنا ماشين فى الطريق نلاقى اييييييييييييييييه
حبة ظبابيط ماشين جمبنا وفجأة راحو موقفينا فى الشارع طبعا الشنطة اللى كانت معانا مكنش فيها غير الجمجمة وشوية فاكهة لزوم الزيارة
وواحد منهم راح ضارب عينه على الشنطة واحنا فى حتة مش مسكونة قووووووى القومية (بس قبل ما تبقى زحمة) انا رحت زى الشطرة واخدة الشنطة من ايد بابا قلت لا لازم اتحمل مسؤلية الجريمة دى لوحدى لو حد منهم سأل الجمجمة دى بتاعت مين هقولهم بتاعتى انا فيها حاجة دى
طلعوا يا عينى الظباط دول تايهين وبيسالوا بابا لو سمحت يا حج متعرفش تخريمة من هنا نخرج منها لحسن احنا جداد هنا وتايهين
وخلصت الحدوتة حلوة ولا ملتوتة
هههههههههههههه معلش يا جماعة انا بس حبيت اكسر شوية من حدة الفورمالين ولو انى معرفش يعنى ايه اصلا الفورمالين .
فكرة حلووووووووة قووووووووى يا هيزن انك تكتب عن يومياتك فى المشرحة ولو انى اعتبر ان ده غش لانى كنت بكتب يومياتى فى المطبخ وان شاء الله انزلها قريب قوووووووووى وانافسك بقى يا عم منافسة جامدة جدااااااااا
على فكرة انا حبيت استمتع بموضوعك زى ما انت كتبته بدون ما احاول انى ارهق نفسى واسأل فى الموضوع بتاع المشرحة كتير يمكن لانى من وانا صغيرة كان ديما الشيخ اللى بيحفظنى قرآن كان يقعد يحكى لنا عن شوية مواقف بتحصل لاصحابه اللى بيغسلوا الاموات ويكفنوهم داخل القبر (دا مش كشف لحرمة الموت ولا حاجة لسمح الله) لا دى مش اكتر من مواقف مرعبة بتحصل لهم داخل القبر نفسه مش بس داخل المشرحة بيتهيالى القبر بيكون اكتر رهبة من المشرحة .
اما بقى يا هيزن عن قرارك انك مش هتدخل المشرحة لوحدك تانى امال يا عمونا تكتب يومياتك فيها ازاى انا ليا واحدة قريبتى كانت المشرحة دى مكانها المفضل لازم يوميا بعد ما تخلص كلية فى وقت متأخر تروح تتطمن على المشرحة وتحس بأنتعاش مش طبيعى بعد لما تخرج منها يمكن علشان كانت مهوووووووسة بحاجة اسمها طب بس للاسف مجموعها دخلها علوم بس فكانت المشرحة دى بالنسبة لها مكانها المفضل .
كانت دايما تقول عنه عالم الهدوء الابدى .
يومياتك فى المشرحة عجبتنى بجد يمكن علشان حاسة ان الهدف من وراها اننا نضحك مش نخاف بعكس الموضوع الاول عن المشرحة كان بحق وحقيقى .
ادينى يا سيدى شاركتك بشوية حكايات حلوووووووووووووووين اهه ههههههههههههه عايزاك بقى لما انزل يومياتى فى المطبخ تبدع انت كمان فى الحكاوى شفت انا برسم على بعيد ازاى
ههههههههههههههههههههههههههههههههههههههههههههههه على فكرة انا بهزر
تسلم ايدك يا هيزن موضوع لذيذ بجد
وحلوة قوووووووى موضوع عند جهينة الخبر اليقين ده (طب تعيش وتفتكر يا هيزن
احلى سلالالالالالالالالالالالالالالالالالالالالام لعم الهيزنبرجيين
فـــــــــــــــــــــــــــــــــــــــــــــــــــــــــــلورندا .

الغالي أحمد عسل
والله عشت معاك لحظات الرهبة وكأن أنا اللي كنت في المشرحة بس بجد اترعبت من شكل الجثة التى جعلوها مستودعا للقلوب...
هذا المنظر بالذات شعرت بأن ذاكرتى لن تنساه لأنه مدعاة للتفكير .. ومدعاه للخيال
فقد قفز لذهنى صورا كثيرة لهذه القلوب وهي تنبض جميعا داخل جوف واحد .. وأنين احباب هذه القلوب يملأ المكان وقلب هذا الرجل "المستودع" يريد ان يقوم ليبحث عن قلبه .. فبرغم انه مستودعا للقلوب إلا ان قلبه ضاع وسط هذه الفوضي!!!

يارب يوفقك يا عسل ويبعد عنك شر الأفكار الغريبة داخل المشرحة

تحياتى