وات هابند يا جدعان !!!!!

السلام عليكم ورحمة الله وبركاته
وات هابند بالصلى على النبى
بصوا انا طول الوقت لا بيا ولا عليا
بس حقيقى فاض بيا
كمان الوحل شغال معايا هقوله لاء
رمضان كريم يا كماحة :
المحزن فى الوقت الحالى اللى احنا فيه دا برامج رؤساء التحرير
طبيعي لما هيما والجلاد والإبراشي والليثي يطلعوا
أروح أدلدل راسي أستفيد منهم حاجه على اعتبار انهم من الاخوة المثقفين
بدل من الهَبل اللى بيحصل فى المسلسلات
بمناسبه المسلسلات
ليه بيقولوا فى التلفزيون بالذات شهر العبادة !
يعنى كانوا يقصدوا ايه ساعة لما قالوا كده
هو مش شهر العبادة دا يعنى الروحانيات بتزيد فيه
يعنى الناس بيبقوا بيجاهدوا للوصول للجنة
والتلفزيون بيجاهد بالعكس تماما بيجاهد لطريق العرى
والخلاعة والفن والدربوكا وكده يعنى
ماشى يا عم الحج مقولناش حاجه المسلسلات دى فن وليه هدف سامى
والمفروض انى اعلامية او مشروع اعلامية يعنى احم احم
بس هو ليه الهدف السامى دا مبيظهرش اطلاقا مطلقا غير فى شهر العبادة
وطول السنة مفيش مسلسل جديد يقول نحن هنا
طيب عندا فيكوا بقى انا قاطعت المسلسلات خالص
ابقوا شوفوا مين اللى هيتفرج بقى ( ايموشن بيطلع لسانه )
لأ وحتى مش مسلسلين ولا تلاتة
دانا فكرت مرة أعدهم من الاعلانات توهت وربنا توهت
يلا ما علينا دع الخلق للخالق
بس صحيح عشان مضحكش عليكوا انا بتابع عايزة اتجوز لانه بيجى فى وقت ببقى قاعده فيه مع أسرتى بعد السحور واوعوا تفتكرا خالص انى بتابعه عشان عايزة اتجوز لاء مش انا هذا الرجل ( ايموشن بيعيط عشان نفسه يتجوز )
بالاضافه انى متابعة دكتورة غاده عبد العال لما كان الموضوع دا مدونة ومعجبة بأسلوبها فى سرد القصة وأفشاتها
بمناسبة العرى والخلاعة وكده اقصد الفن الفن بتلغبطونى كده ديما
موضوعنا اصلا كان عن رؤساء التحرير
أنا مكنتش مصدقة إن الصحف "المستقلة" دي كلها سبوبة معارضة
وأيه صحف كبيرة يعنى وليها قيمتها
وانا قال ايه عاوزه اجاهد ان الجورنال اللى انا فيه ينول اعجاب السبوبة
اقصد الجماهير يعنى
بس لما شفت تفاهة السادة رؤساء التحرير
وهم نازلين أسئلة عبيطة لمجموعة أعبط وأضل سبيلا
عرفت إن فعلا سقراط كان عنده حق
الفلوس الفلوس
كل شيء يجي بالفلوس
والجميل إن السادة رؤساء التحرير المثقفين
عاملين إشتراك مترو مع بعض
بيباصوا الضيوف لبعض
النهاردة هيفا عند الإبراشي والجلاد
وبكره عند عمرو الليثي
ومؤكد برضه ابراهيم عيسى ها ينوبوا من المزة جانب
وهكذا أصبحت الأخت الفاضلة بتعلمنا مكارم الأخلاق
فى رمضان
لما يجبولنا هيفا فوفو حبيبتى وحبيبة البنات كلهم ( تريقة طبعا كلها أحقاد بعيد عنكوا ) فى رمضان اومال يجيبولنا مين فى غير رمضان
لاء وبوسى سمير تألقت الملاك الفتاك مع منى الحسينى
بجد انا شكيت فى نفسى كنت ظالمه الوليه يا جماعة دى مش خليعه ولا حاجه الناس فاهمينها غلط ربنا يهدى
ويقولك ان الشياطين بتبقى بالسلاسل
مهو خلاص مبقاش ليهم لازمه احنا بقينا بنقوم بالواجب فى كل شىء تقريبا

اوووووووه يالهوتى يالهوتى
كنت هنسى الاعلانات
بصراحه انا زمان كنت من متابعى اعلانات رمضان
دوأتى بقى فى حقيقة الأمر
العبط بقى اخر خمسين حاجة
فرضا انا قعدت ادام التلفزيون زى البنى آدمين على اعتبار انه لحد ناوو التلفزيون مرتبط بالبنى آدمين فقط
لو تابعت برنامج من احد البرامج المذكورة او غير المذكورة اسمع جملة الاقى سبعين ألف إعلان لدرجه طبعا اننا بننسى كنا بنتفرج على ايه
والمشكلة ان دا كان من فترة أزمة بس كالعادة زى أى ازمة فى بلدنا
نحن شعب يعيش ويتعايش
بس الازمة تطورت بقت بشكل مستفز يعنى مش كفايه مستحملين أرفكوا عشان نتنيل نشوف البرنامج
لاء اعلانات خنيقة جدا
زى مثلا اعلان استرجل واشرب بيريل
وحط الأنكل ع الركبة
الحمد لله
عرفنا نعالج مشكلة نقص الرجولة يا جدعان
إنت حط الأنكل ع الركبة
علشان تستحمل المرار اللي انت طافحه
ده نيوتن ميعرفش يكتشف الإكتشاف التفاح ده
العجيبة دي فعلا من عجائب الدنيا

دلوقتي إيه علاقة رمضان بالبناء والمرشدي وطلعت مصطفى؟
اقولك انا العلاقه بين المرشدي وطلعت مصطفى ومربى الميزان .. جميعهم بيشتركوا في نظام زلابيا فوور اوول
حاجه عجيبه فعلاً !! شكلهم مش بيعمروا غير في رمضان .. عشان التعمير يبقى بزمة
او على اساس مثلا ان الشعب العادى بتاعه كل واحد بيلعب بالفلوس لعب
بجد احنا حالنا تدهور مش عارفين نودى فلوسنا فين يا كماحة

وفى النهايه لان مصر مالهاش نهاية وتتوالى الازمات اقصد يعنى الاحداث
ابتسامة عابرة مش بتعبر عن أى حاجة
اتمنى تكونوا اتنقطوا من الفضفضه دى اقصد يعنى استمتعتوا

بقلم ليتل كات

منتظرة ردودكوا

موضوع جميل يا ليتيل وبيناقش قضيةمن اهم القضايا اللي موجودة دلوات فعلا زي ما بتقولي واللي مابيحسش بيها الا اللي زيك لكن هي بعكس القضايا التانية اللي بتنال اهتمام الناس يعني ممكان اكون غلطت اني اطلقت عليها لفظ قضية

ماعلينا المهم

انا فعلا مش متابعة اوي التليفزيون
بس فعلا اما باقعد شوية بازهق وبامل من اللي بيحصل فيه
المسلسل يتعرض عشرين مرة في اليوم تقلبي من قناة لقناة تلاقي نفس المسلسل
دا غير البرامج اللي مالهاش اي هدف

وكملت بالاعلانات صحيح زي مابتقولي
ان فيه شباب جابوا بريل علشان يجربوا هيقدروا عليها ولا لاء
اهو دا اللي ناقص

والبرامج الدينية تتعد ع الصوابع
دا غير انها مابتتعادش زي ما المسلسل بيتعاد

وربنا يهدينا يارب
ويهدي الجميع
اللهم امين

صحيح نسيت اقولك
عودا احمدا

khjournalist كتب:

تسلمى يا قمر
وسورى عالمناقشه العنيفة
بس هو انفعال فى داخل المناقشة ليس إلا
واكيد انتى عارفة نيتى