بستان الصداقة (2)

عندما نشر في هذا المنتدى خاطرة بعنوان بستان الصداقة منذ عام او اكثر تاثرت بشدة بهذه الخاطرة حتى انى عندما قرأتها لعلى لم اذق للنوم طعما لما شارف الاسبوع لان هذه الخاطرة كانت في اكثر وقت كانت الخلافات محتدمة بيننا كاصدقاء و تعرضت صداقتنا لمحك قوى لعلى لازلت اعانى من تبعاته حتى الان ... ورغم جو الخاطرة الملىء بالدفء شعرت انا بقسوة الشتاء وشعرت تلك الكلمات وكأنها رصاصات تعتصر قلبى وعقلى بلا هوادة خاصة تلك الجملة التى حفظتها منذ اول مرة قرأتها لانها عبرت عن حالتى بالضبط ليس من الناحية المعنوية فقط ولكن فعليا ايضا حيث تخلى عنى الجميع بالفعل فكان الجمع في واد وكنت انا في منطقة نائية لا اجد فيها احدا "ذلك الاحساس العجيب بان العالم يسير في سعادة وهو يرتقى هرم نحو القمة وايادى ساكنيه مرتبطة بعضها ببعض بينما ابقى انا وحدى في الاسفل انتظر مصيرى المجهول" واحسست حينها انى وحدى وان اصدقائى الذين طالما احببتهم قد تخلوا عنى في أول اختبار لصداقتنا ........... حتى الان احاول ان لا اتذكر تلك اللحظات ونفس تلك اللحظات مهدت بعد ذلك الطريق لان نتفرق جميعا كما يعى جميع من يقرأ تلك الكلمات ويعرفنا حقا سيعلم ان كلماتى تلك صحيحة بنسبة كبيرة

لا .... لست هنا لاتجرع مرارة ما مضى ولله الحمد فلست من ذلك النوع من البشر ولكنها فقط مقدمة لما اشعر به احيانا خاصة تلك الايام وهذا العام بشكل عام فالازمات هى التى توجه قناعاتنا نحو الافضل

لقد ادركت ان الصداقة والاصدقاء ليسوا اولئك الاشخاص المحيطين بك دوما اينما حللت وليسوا من هم معك في كل لحظة ومع اول ازمة تنهار اللوحة الجميلة التى طالما ظللت تخطها بريشة فرحة

انما الاصدقاء هم اشخاص يشعرونك بالدفء بمجرد التقاء نظراتكم من بعيد ..... الاصدقاء الحقيقيون هم من يتركون العالم باسره فقط ليكونوا بجوارك ولو للحظات قليلة .... الاصدقاء هم من تلقاهم بعد طول غياب وفراق فتشعر وكأنهم لم يفارقوك للحظة واحدة وكأن تلك السنين التى تفارقتم فيها زادت من قوة ما بداخلكم

الصديق هو من تشعر بأنفاسه تحيطك فى كل مكان في نفس الوقت الذى تتسع فيه المسافات المكانية بينكم والمساحات الزمنية المخصصة للقاء تتضاءل

اصدقاؤنا الحقيقيون هم من عزرونا وقت الضعف وعذرونا عند الخلاف وأيدونا طالما كنا في حق وصححوا مسارنا اذا حدنا عن الطريق القويم

... اصدقاؤنا هم من احبونا بحق بعيدين كنا او قريبين .........

اصدقاؤنا هم من احبونا حتى النخاع واحببناهم حتى الموت

السلام عليكم

ازيك يا اية
عملانة اية

وانا مش هاغلط فيكي
ولا اكلمك
ولا هاتنفس
ولا هابصلك
ولا هاقولك حاجة نيفر نيفر
غير
اية الكلام دا كله يا استاذة اللي انتي كتباه دا
ياتري دا حقيقي من قلبك
ولا

واضح جدا
وضوح الشمس
انه من قلبك

وانا طبعا معاكي في الكلام اللي قلتيه
بس بعيدا عن الكلام اللي في الاول
لاني ماعرفش تقصدي مين
لكن انا اقصد ان الصديق الحقيقي هو اللي يقف جمبك في وقت الشدة وقت ماتحتاجي ترتمي في حضنها وتبكي تلاقيها متحملاكي تكون مستحملاكي في وقت عصبيتك او هدوءك مش اللي تبعد عنك مجرد ماخلاص الدراسة تنتهي
وانا ماقصدش انها مثلا بتبقي محتاجة حاجة منك في الدراسة لاء انا اقصد ان مجرد ماتبعد اسبوع يبقي الصداقة انتهت

الصداقة هي اللي بتستمر حتي بعدت المسافات بينهم و كانت بالتليفون

وعندي سؤال
لية دايما ناس كتير بتحاسب اصحابهم علي حاجات هما السبب فيها ؟؟

وانا من موضوعك دا يا اية باشكرك
وباشكر كل اللي وقف جمبي في اي ازمة مريت بيها
وشكر خاص جدا جدا جدا لصديقتي وحبيبتي واختي ومعلش هاكبرك مامتي
فلـــــــــــــــــــــــــــــورنــــــــــدا
لانها فعلا تستاهل كل خير
ومش عارفة اقولها اية تاني
طبعا هي اكيد حاسة بالكلام اللي انا عايزة اقوله

ومعلش لردي متاخر يا يويا
وشكرا لموضوعك دا
اسفة ع ردي المتاخر دا

سلام

أيه و خيرية وحشتوني كثير ازيكم .. سبحان الله أنا بقالي حوالي سنة ما دخلتش المنتدى و ادخل الاقيكم بتكتبوا في ذكرى بستان الصداقة اللي انا كتبتها ...

خاطرة رائعة لا تختلف عن المستوى الراقي الذي امتعتي به كل اعضاء المنتدى في مشاركاتك يا ايه ..

كل سنة و انتم بخير و رمضان كريم عليكم جميعاً

هيزنبرج
دكتور أحمد
يا مراحب يا مراحب
منوووووووووووووور المنتدي والله
وحشتنا ووحشتنا ردودك وموضوعاتك طبعا
وكل سنة وانت طيب يا دكتور

ومنتظرين دخولك مرة تانية
حتي لو احنا مابنبقاش موجودين
اكيد بندخل ونشوف ردودك

ومرة تانية نورتنا

السلام عليكم ورحمة الله وبركاته

خوووووووووووووووووووووووووووووووخة

معلش على تعليقى المتاخر على تعليقك المتاخر لان النت كان بعافيه عندى
ده طبعا غير رمضان والواحد بيبقى مجرد رؤيته للجهاز من بعيد صعبة نوعا

بعيدا عن الاول والاخر

المهم المغزى بتاع الصداقة ده احيانا مش بيبقى اللى احنا فاهمينه
لاننا مختلفين ومش كلنا بنفكر بنفس الطريقة
ومش كلنا شايفين نفس الوجه من العملة ويمكن ده اللى بيخلينا نصدم ف بعض الناس احيانا
مش عشان الناس دى وحشه ان شاء الله الناس كلها بخير
بس عشان احنا افكارنا عن فكرة الصداقة نفسه مختلف ومش كلنا بنشوف معنى الصداقة الحقيقى بنفس القوة
ع فكرة الكلام اللى ف الاول من قلبى بجد
لكن الكلام اللى تحت من قلبى بجد بجد بجد ومش قلبى بس من قلبى ومن عقلى لكن انا حبيت احط نفسى واى حد هيقرا لموقفين كلنا بنتعرض ليهم دايما
ونقعد نسال روحنا
ياترى المشكلة فين ومين الغلطان
شوية نغلط نفسنا وشوية نقول لا التانى هو اللى اتخلى عنى
والحقيقة غير كده
الحقيقة ان كلنا كويسين بس افكارنا عن الصداقة ومعناها والحاجات اللى تعبر عنها مختلفة
ولما بنلاقى حد بيفكر بنفس طريقة تفكيرنا عن الصداقة بيدينا احساس بالامان قوى وبنحس اننا لقينا اصدقاء بجد
ولما بنصاحب ناس ويطلع موقف يظهر الاختلافات ف المعتقدات مابينا يطلع حد مش بيفكر زينا فنقول عليه سابنا لكن الحقيقة هو مش مدرك ده هو بس تعامل بمعتقداته بغض النظر وانا مش هنا عشان احكم افكارنا غلط ولا لا
لكن احنا بنحلل الموقف سوا عشان نوصل للحل بجد وعشان نستريح ونريح اللى حوالينا
كمان

ودايما الناس اللى متوافقين فكريا ف معنى الصداقة معانا عشان نحس بيهم بجد ونعرف قيمتهم لازم نقابل الناس اللى مفهومهم مختلف عشان نقدر نقيم علاقتنا بجد ونحس بقيمه اصدقاءنا الحقيقين بجد

معلش يا خوخة طولت عليكى ورغيت موووووووووووت
بس اصلك وحشانى حقيقى
كمان احنا بقالنا قرن ما اتكلمناش
ولو حتى ع الميل

سلام عليكم

السلام عليكم ورحمة الله وبركاته

حمد لله على سلامتك يا دكتور
منور المنتدى بوجودك كعدنا بيك دايما
وبصراحة انا كنت قلت خلاص انت شكلك شيلت المنتدى من favorites list
وعلى العموم عودا احمد وياريت تنورنا بوجودك دايما

اما موضوع بستان الصداقة ده فهى حقيقى خاطرة رائعة واثرت فيا جدا مش المعنى السلبى اللى قلته ف الخاطرة دى لكن لولا
المعنى الايجابى اللى فيها ماكانش الواحد هيحس بالمعنى السلبى

وبعدين ايه يا دكتور هو اللى بيتكتب عندنا بتنسى ولا ايييييييييييييييييييييييييه
احنا هنا ولا ذاكرة التاريخ

مشكور على مرورك يا دك
ومستنين جديدك

سلام عليكم

انا مختلفة معاكي تماما يا اية
لان الصداقة مالهاش غير معني واحد واللي الكل عارفه
ان الصديق اللي يخاف علي صديقه ويحسسه بالامان زي ماقولتي ويحسسه بقيمته عنده ويغفر له ان غلط واللي بتستمر العلاقة حتي بعد الجواز او انتهاء الدراسة او انشغاله بعمل مثلا

لكن مالهاش علاقة بالتفكير ولا الاختلاف في المعتقدات زي ماقولتي دا من وجه نظري
لان من حيث التفكير فدا بيبان في اول العلاقة بين الطرفيين ولو طرف منهم عايز يستمر بالرغم من العيوب اللي شايفها في التاني فدا اختياره ومايلمش عليه صديقه بعد كدة لانه عارف انه كدة ويحاول يصلح منه لو قدر طبعا مفهوم كلامي

فانا فعلا مختلفة تماما معاكي
معلش طولت عليكي
يلا سلام

اول حاجه بحييكى يا آيوته عالموضوع الاكثر منت رائع
انا معاكى فى فكرة الاختلاف
وحابه اوضح لخوخاية
هو المعنى كمعنى غير مختلف
لكن طريقة كل واحد في الصداقه مختلفه
يعنى انتى ليكى اسلوبك اللى بتعبرى بيه عن معنى الصداقة دا
لكن حد تانى ليه اسلوب تانى خالص فى التعبير عن صداقته بفلان
زيها بالظبط زى اللى بيحب المانجه واحد بيحب يشربها عصير وواحد تانى مبيحبش غير انه ياكولها كده مش عصير
لكن فى النهاية هما الاتنين بيحبوا المانجه والمانجه ليهخا قيمتها عندهم

بالنسبه للموضوع بقى
انا معاكى جدا يا آية فى فكرة ان الصديق بجد مش شرط يكون الانسان اللى انتى اختارتيه يبقى صديق ليكى
ولا شرط يكون هو اللى عيشتى معاه سنين كتير
بدليل ان الواحد بيجى فى وقت ويقول لحد يارتنى كنت قابلتك من زمان
هنا المعنى هنا بيعبر عن انه عاش حياته اكيد حواليه ناس كتير بس مقابلش الانسان اللى بجد ويحس معاه الصداقه بجد غير دلولقتى
وعلى فكرة الصداقة مش العموم فى الوصف محتاجه ألافات مؤلفه من صفحات المنتدى
لانها اكبر من إنه يتعبر عنها بكلام

شكرا ليكى عالموضوع يا جوالنالستايا

» بستان الصداقة ...
» سفن قابلة للغرق