انا بردو زيك يا حجر

كان ياما كان .. كان فيه حجر

فوق تل عالى ينام و يصحى يشوف جمال شمس و قمر ..

ولا عمره فكر فى الى تحت ..

ولا عمره شاف ناس أو شجر ..

عايش لوحده فى مملكه فوق الجميع .. ولا حد قادر يوصله .

لكن فى يوم هجم المطر ..

هبت رياح ..

و اتحرك الحجر اليتيم ..

لقى نفسه فوق المنحدر ..

لا فى ايده يثبت مطرحه ...

ولا حتى يعرف سكته ..

واخده الطريق بين الحفر ...

حفرة يمين ... حفرة شمال ...

و صاحبنا خايف من مصيره المنتظر .

ياترى الرياح واخداه لفين ...

دا سؤال أكيد هاتبان أجابته مع الزمن ...

و الصبر هم تقيل اوى عاللى صبر ..

انا بردو زيك يا حجر ..

عايش تملى على الكفاف ..

ولا حد سامع شكوتى ..

ولا حد شاف ..

ولا عمرى بافرد طولى أكتر م اللحاف ..

بارسم حياتى يوم بيوم ..

و تملى فارد ضهرى لزكيبة الهموم ..

بس الزمن صعبان عليه أفضل كده ...

لازم لكل طريق .. ندا

خدنى فى طريق من أوله مليان حفر ..

القصد .. يعنى بالمفيد المخصر ..

اتغيرت كل المعانى و الصور جوا العيون ..

مابقيتشى عارف فين انا ..

ولا مين أكون ..

العمر عدى ..

و الورد ندّى ..

بس فجر الحلم هدى ..

و انكوت فيا الجروح ..

روح يا زمان .. و تعالى بيا و روح ..

غير ظروف ..

بدد سراب ..

بدل طموح ..

جدد آمال ..

حقق خيال ..

الضلمة فوق الروح جبال ..

و النور حقيقة .. و احتمال ..

انا أصلى اتعودت خلاص ..

اتعودت خلاص عالغربة ..

اتعودت انى ابقى وحيد ..

اتعودت أبص لنفسى بإحساس غيرى و اشوفنى جميل ..

و افرح بيا ..

و احكى معايا ..

و اسمع صوت الشوق جوايا لكل بعيد ..

و اتمنى الأمنية الغالية ..

ارجع تانى طفل صغير ..لسه وليد

مش عارفة ارد اقول اية

ربنا يوفقك يارب يا اسطي

دامت موهبتك

طيب ليه تعودت إنك تحس باحساس غيرك و تقول كلام غيرك ؟؟

و ليه تتمنى ترجع صغير ؟؟

طبعاً إنت حر و أنا مش باتدخل في كلمات قصيدتك اللي مفيش خلاف على احترافيتها و احترافية صاحبها العالية ...

أنا بس قصدي إني مبسوط إني كبرت و بحاول بقدر الامكطان اقول الراي اللي صح سواء بتاعي و لا بتاع غيري ... المهم ما نقولش الغلط .. الغلط مذموم حتى لو كان راي الشخصي .. و الصح ممدوح حتى لو كان راي أعدى أعدائي ده مبداي و بذلك اعتبر الحق ملكي و أعتبر نفسي احق به اينما وجد ...

و شكراً

خوخة .. منورانى و مكترانى ياغالية ... تحياتى ليكى ..
هايزنبرج ... فهمتنى غلط يا صاحبى ..
انا باقول " اتعودت ابص لنفسى بإحساس غيرى و أشوفنى جميل " .. فهمت معناها بالصورة دى ازاى بس
دانا حتى باقول قبلها اتعودت انى ابقى وحيد
يبقى المقصود هنا انى علشاشن وحيد و ماباخالطشى ناس أو علاقتى بالناس كلها بق سطحية .. مابقيتشى باهتم إنى أعرف رأى الناس فيا .. انا كفيل أقول رأيى فى نفسى علشان انا عارف إنى من جوا جميل ...
دا مش معناه انى باقول نفس الكلام اللى بيقولوه الناس ...
دا معناه إنى متوحد مع نفسى و باكلم مع نفسى كتير ...
و الا ماكنتش قلت بعدها
و افرح بيا .. و احكى معايا ..
اما بالنسبة لإنى باتمنى أرجع تانى طفل صغير فدا حقيقى ..
صدقنى
انت لسه صغير يا هايزنبرج و بدرس و ماجربتش قسوة الحياة بعد التخرج و لما تلتزم بشغل و يكون ليك دخل ثاب ما ينفعشى تتخلى عنه علشان مسئولياتك تجاه ناس كتيرة أوى أولهم نفسك ..
صدقنى انت ماجربتش .. و لما تجرب هاتعرف انا باقول كده ليه ..
تحياتى ليك يا جميل ..
و نورتنى للمرة التانية

السلام عليكم ورحمة الله وبركاته

بما ان لا يجوز اعلق القصيدة من جهة شعرية

لان اعتقد انك خلاص عديت مرحلة التعليقات

وبالذات من حد زييى معلوماته الشعرية اضعف ماتكون وكتاباته لم تتعدى حدود الهواه

فاسمحلى انا مش هاعلق لانك اكييييييييييد عارف ان القصيدة هايلة ونحفة ومش محتاج يتعلق عليها عشان بتعرف كده

بس لو تسمحلى انا ليا تعقيب على فكرة معينة فيها

مش عارفة ليه حاسة ان ابطال قصايدك اليومين دول انهزاميين زياده عن اللزوم

معاك ده حالنا كلنا فى لحظات معينة

لكن مش حد عايش حياته
عمره ما فرد طوله اطول م اللحاف
على قد ما التعبير عجبنى ع قد ماحسيت طب ايه الامال اللى اجددت وايه الحلم اللى اتبنى مع حد حرم نفسه من انه يحلم
طبعا لازم يكون فيه قتاعة ونرضى بالمقسوم لكن فيه فرق بين الرضا والانهزام الرضا انا راضى بنفسى صحيح ومعترف بقدراتى بس باحاول اطورها عشان احقق احلامى وما استسلمش للظروف ومااكونش زى حجر اسمحلى مجرد جماد انا عندى عقل ومشاعر واحلام يعنى باختلف عنه اختلاف جذرى هومستسلم لان ماعندوش اراده يغير بيها لكن الانسان حاجة تانية لكن الانهزام ان يكون عندى اراده بس مقضيها احلام وخلاص لدرجة انى تشبعت ولما ماعرفتش احقق احلامى قلت اكيد انا حلمت اكتر من طول لحافى المفروض اضم رجلى عشان ارجع تحت اللحاف ف دفا الظروف اللى محسسانى انى مش مقصر واقول لنفسى برافو انت كويس بس اصل اظروف وحشة وخلاص يخلص اليوم على كده
وللمرة المليون وده مجرد راى شخصى الوحدة قرار احنا اللى بناخده وفيه ناس كتير بتستمتع وهى وحيدة فبتاخد القرار ده مع انه مايكونش اتفرض عليها اللى عايزة اقوله عشان ما اطولش عليك اللى عايز حاجة بيعملها والانسان جواه طاقات هو نفسه مايعرفش مداها فما ينفعش يكون زى الحجر حتى لو كانت ظروفهم واحدة الانسان هو الى بيخلق الظروف لكن الحجر مش قدامه غير انه يتبعها
وابص لنفسى باحساس غيرى انا فهمتها ان رايك مختلف عن راى الناس فيك وانك شايف انك جميل وتفرح بيها عشان الناس شايفة كده فتصدقهم حتى لو رايك مختلف ده اللى فهمته
وبصراحة احنا مش محتاجين نرجع اطفال لان اغلبنا اصلا ماكبرش وماطلعش من حدود الطفل جواه
ودايما عايشينه بالذات لما نحس بمسؤليات الكبار وارجع اقول لنفسى بدى ارجع بنت صغيرة على سطح الجيران وينسانى الزمان
بس ده بصراحة بيبقى هروب منى شخصيا من مشاكلى لكن ف النهاية كل سن وليه جماله واجمل رحلة ف الدنيا هى لرحلة الصعبة اللى بنشيل فيها مسؤلية وتبقى مليانه صعاب فلما ننجح نفرح بجد ولما نضايق نضايق بجد ولما نبكى نبكى بكل قوتنا
صدقنى الحياه من غير مشاق وصعاب مالهاش قيمة ولا طعم

معلش طولت عليك
بس ماحدش قالك تعمل قصيدة فى الجمال ده
وبتعبر عن ناس كتيرة قوى
وبتعبر عن لحظات كلنا بلا اسثناء بنمر بيها كتيييييييييييييير
بس المهم انها ما تتغلبش علينا لاننا لازم دايما نكون اقوى

تقبلوا مرورى وفائق احترامى

سلام عليكم

آيه ... يادى النور يادى النور ...
تملى انتى تعلقى على مواضيع بمواضيع يا آية ...
ما علينا ..
انا بس عايزك تقرى القصيدة مرة تانية ..
و تحاولى تعيشى جوها كأنها مكتوبة عنك ..
صدقينى فكرتك عنها هاتتغير ...
عايز أقولك إنها من أجمل القصايد اللى كتبتها بجد و دى وجهة نظرى ..
و الجو النفسى فيها متكامل جدا ..
جربى بس تقريها تانى زى ما قلتلك .. و انا مستنى تعليقك للمرة التانية ...
تحياتى

أيوة صحيح ... بالنسبة بقى لمواضيع الأبطال الإنهزاميين ..
أوعدك يا ست آيه المرة اللى جاية هايبقى الوضع مختلف ..
و القصيدة اللى جاية هايبقى كلها تفاؤل ..
انا تقريبا خلصت نصها ...