حسبنا الله ونعم الوكيل

حسبـنا الله ونعـم الوكيـل

{وقل اعملوا فسيرى الله عملكم ورسوله والمؤمنون وستردون إلى عالم الغيب والشهادة فينبئكم بما كنتم تعملون}(التوبة 105).

احببت ان أستشهد بهده الآية الكريمة لان أصدق الحديث كتاب الله و هدا الاستشهاد أعتبرها كرسالة لمن يفهم معنى الرسائل أو كصفعة لمن أصابه الإغماء

و هي تتحدث عن مشكلة من اهم المشاكل التي تحدث في الجامعات وقد يفعلها الموظفون هناك دون دراية للمثل القائل كما تدين تدان....لأنهم يعلمون ان ليس هناك من سيدينهم فاللهم اني أسألك الهداية لهم

ان مايفعله الموظفون داخل الجامعة قد يحدث لابنائهم يوما ما في جامعة ما وهو نظام تجاهل الطلبة داخل الجامعة وعدم تلبية مطالبهم و كأنهم اناس مجردين من الانسانية .. والأدهى من ذلك هو الجحيم الذي بات يفزعني سماه البعض المحسوبية وسماه الآخر الواسطة وسميته انا الحقارة .

انني اذكر بهذه الايات اننا لدينا رقيب عتيد شاهد علي كل شيء فلا بد أن يعلم كل واحد منا ان لديه وقفه امام رب العالمين يوم لا ينفع الانسان ماله ولا ولده ولا حتى محسوبيته

و من هده الصرخة المكتومة أحب ان أقص لكم حكاية لا توجد في ألف ليلة وليلة ولكن توجد في جامعتنا التي أصبحت تفسد بين نهار وليلة...قصة صديقة كادت تغوص في دموعها حين دار بينها وبين موظفة من الموظفين الكرام حدثا اعتبره نموذجا مصغرا للاحداث التي تجري في الادارات العامة والمصالح الحكومية ...الموظفين اللدين أشد على أيديهم تشجيعا لما يبدوه لنا من اهمال وكأننا لسنا بني ادمين

الطالبة | السلام عليكم ........ازي حضرتك

الموظفة | اهلاااااا

(من غير رد السلام وعديناها المهم)

الطالبة | بعد ازن حضرتك عايزة ادفع المصروفات وعايزة ........

(من غير ماتكمل كلامها ردت الموظفة مقاطعة لكلامها)

الموظفة | مش هنا روحي مكتب رعاية الشباب

الطالبة | انا رحت قالولي انه هنا

الموظفة | روحي مكتب رعاية الشباب

الطالبة | طيب شكرااااااااااا..........

(برضة ماردتش يلااا ان شاء الله ماعنها ردت ...... المهم رحنا مكتب رعاية الشباب زي ماسيادتها قالت )

الطالبة | بعد ازن حضرتك عايزة ادفع المصروفات والمدام بتاعة شئون الطلبة قالتلي اجي لحضرتك

الموظف | لاء مش هنا روحيلها هناك هو الدفتر عندها هي

الطالبة | بس هي قالتلي انه مش عندها وعند حضرتك

الموظف | لاء يا بنتي مش هنا والله روحيلها تاني

روحتلها وبعتتني لكذا مكتب كدة ودا كله علشان ادفع المصروفات المهم اخر مرة رحتلها وربنا هداها وهداني وردت عليا واتكلمت معاها

الطالبة | يامدام الاستاذ اللي هناك قالي ان الدفتر عند حضرتك شفيه كدة

الموظفة | اه استني كدة انا كان عندي نسخة بس ماعرفش تايهة فين دي استني كدة

وفجاة جه ولد شباب كدة تقريبا بيدرس في الجامعة وعايز حاجة منها

الموظفة | اهلا حمادة ازيك يا حبيبي عامل اية

الواد | الحمد لله ازيك يا طنط

الموظفة | الحمد لله يا حبيبي ازي مامتك

الواد | الحمد لله كويسة بس انا كنت عايز ........

وانا وصحابي طبعا واقفبين بنولع في نفسنا وبندعي علي الواد دا والست دي . وطبعا اتركنا علي الرف رف اية يا ريت الرف دا احنا اترمينا في الرسايكل بن

الموظفة | طيب تعالي اقعد يا حمادة واقف ليييييييية

((واحنا واقفين ومش عارفين ناخد حق من حقوقنا كطلبة ربنا ينتقم منها )

الموظفة | قولي يا حمادة تشرب شاي ولا قهوة

الواد | لاء شكرا يا طنط انا هامشي بسرعة

وفضلت تتحايل عليه شوية كدة يعني نص ساعة تقريبا لغاية ما الواد كان عنده زوق وماشربش حاجة

الطالبة | بعد ازن حضرتك عندي محاضرة ممكن تجبيلي رقمي من الدفتر اللي عندك

الموظفة | خد يا حمادة هي دي الورقة اللي انت عايزها

(الواد بص للطالبة وكانها يا حرام صعبت عليه وقال)

الواد| اه هي يا طنط هي دي متشكر خالص

الموظفة | طيب استني املالك بياناتك

الواد | لاء يا طنط ماتتعبيش نفسك شوفي شغلك انتي وانا هاملاها

الموظفة | شغل اية بس يا محمد هيجيلي اعز منك

(البت يا حرام كان هاين عليها تنفض الواد والموظفة دي بس الحمد لله هديناها )

الموظفة | قوليلي انتي عايزة اية باه

الطالبة | حضرتك لسة بتسالي ..........عايزة اشوف رقمي في الدفتر

الموظفة | طيب استني اشوف الدفتر هنا ولا في رعاية الشباب

الطالبة مقاطعة | انا رحت رعاية كذا مرة وقالولي هنا وهو اكيد هني بس دوري حضرتك كويس

يادوب الست بتمد ايديها لاقيت الدفتر ماكان من الاول ولا هو النظام الغبي دا لازم يستعملوه

الموظفة | الدفتر اهو ماعرفش كان تايه فين ..........خدي باه دوري علي اسمك .....انما قولي يا حمادة عامل اية في الكلية

البت طبعا كانت خلاص هاتولع في نفسها بس هديناها بس بصراحة بصينا للواد دا بصة كانت هاتحرقه رغم انه مالوش ذنب بس نعمل اية باه

الواد | الحمد لله يا طنط تمام

الطالبة | اهو رقمي اهو ....... عايزة باه ازن دفع

الموظفة | طيب استني اما املأ بياناتك

وأخيرااااا الست ملأت البيانات واديتنا الورقة علشان نروح الخزنة وتدفع المصاريف وطبعا ماكناش مصدقين نفسنا

الموظفة | خدي باه الازن دا وروحي الخزنة وادفعي المصاريف

الطالبة | حاضر ..........وهي بتمتم في الكلام

المهم راحنا لاقينا الخزنة مليانة طلبة كتيرررررر خالص وكأن الطلبة كلهم اتجمعوا في اليوم داا علشان يدفعوا المصاريف........ يا سبحان الله

الطالبة | قالت وهي تتمتم في الكلام ......يعني لو خلصتني الست دي من بدري كنت جيت بدري ودفعتهم وخلصت

المهم البت زنقت يا عيني بين الطلبة ودخلت علشان تتدفع المصاريف فقالتلها الموظفة وياريتها ماقلتلها دي صدمتها

موظفة الخزنية | اية دا يا بنتي مين عامل الازن دا ماينفعش نصه احمر والنص التاني ازرق طبعا ماينفعش

الطالبة | المدام بتاعت القسم عندنا هي اللي عملته والله هي انا مش هاكدب عليكي والله تعبت جدا لغاية ماعملته

الموظفة | معلش يا بنتي دي مسئولية روحي خليها تختمه

يعني المدام دي لو دماغها في شغلها ومش مع حمادة بيه ماهو كانت خلصت من بدري .....المهم رجعنا تاني للمدام تاني دا اية اقصد للمرة العاشرة

الطالبة | حضرتك المدام بتاعت الخزنة بتقولك اختميه

الموظفة | اختم اية دااا مش عايز ختم روحي رعاية الشباب

(وزي مايكون عليها عفريت اسمه رعاية الشباب )

الطالبة | حاضر..........( وهي خلاص هاتقع من طولها يا عيني ) بعد ازنك عايزة اختم الورقة دي

الموظف| تختميها ازاي يعني مش بتتختم منه هنا من عند المدام بتاعت القسم بتاعكم يا بنتي

الطالبة | انا كنت عندها دلوقتي وبتقولي انه عند حضرتك انت

الموظف | لاء عندها روحيلها تاني

الطالبة | (ماشية وخلاص الشر بينط من عنيها وربنا يستر ) ......... قالولي الختم مش هناك هناااااااا

الموظفة | اه جيبي كدة

وراحت واخدة الورقة من البنت ومضت عليها بكل سهولة ..........طيب لية اللف والدوران داااااا المهم البنت اخدت الورقة ورايحة الخزنة تاني علشان تدفع المصاريف وبعد مازنقت كالعادة في الطلاب ودخلت واخيرا دفعت المصروفات .

بس فيه مشكلة .............اية هي................لازم البنت تروح للموظفة بتاعت القسم اللي دوختها علشان تسجلها انها دفعت المصاريف في الدفتر بس كان فيه شباك قريب من الخزنة وممكن تسجلها من غير تلفلها مكتب الشئون للمرة الخمستاشر

الطالبة | اتفضلي انا دفعت المصاريف ...........اتفضلي

الموظفة | لفي ادوري

كانت خلاص هترتكب جناية قالتلها

الطالبة | بتقولي اية الف ............لا حراااااااااااااااااااام والله العظيم حراااااااااااااااااام

فتقريبا البنت صعبت علي الموظفة وحنت عليها وقالتلها طيب جيبي الوصل .اخدت منها الوصل وسجلتها

واخيرا البنت دفعت المصاريف

بس هل يا تري علشان ندفع المصاريف في الجامعة نستغرق من الوقت ثلاتة ساعات تقريبا ؟

طب احنا لو سكتنا على الظاهرة دي هتطول المدة وبدل تلات ساعات هنستنى أسبوع

وهل علشان ماعندناش وسطة زي حمادة باشا نتركن علي الرف كدة لحد ما تنسج العناكب خيوطها على ريوسنا ونتزل بالطريقة دي علشان ندفع المصاريف؟

امال لو عايزة حاجة من دكتور في الجامعة يعمل اية دا؟ المفروض يطردني علي كدة طالما موظفة في الجامعة مابترعيش ربنا في شغلها دااااااا هو يعمل اية غير انه يطردنا !!!!

و بعد الكلام ده كلو اللي لو تحسوه فعلا هتشوفو اني كتبتو بالدموع ومش بالحروف بعد ده كلو خلينا نسأل كلنا.....هل أمثال اولئك الموظفين يستحقون أن يكونوا موظفين؟

سلام

ياربى انا تعبت وانا بقرا الكلام بس
امال البنت دى عملت ايه؟ الله يكون فى عون الجميع

شكرا لردك سلام مصري
نورتنيني

البت اتدبهدلت في اليوم دا

والرتين والكلام الهايف اللي بيحصل دا واللي مالهوش لازمة ابدا

بس اللي عملته

قالت حسبنا الله ونعم الوكيل

واكيد يترد لها في ظروف احسن من دي

سلام

ملوا البلد
البيرو\قراطية في مصر .... هي البيروقراطية كما يجب أن تكون