حلم بكرة

كل يوم بيعدى بيغير كتير

فى اللى عدى .

. و اللى جاى

كل يوم تحديد مصير

كل يوم إحساس حقيقى جوا قلبك يستجد

و أما قلبك ييجى يحلم .. يلقى نفسه فى حارة سد

تلقى إنك -غصب عنك - للظروف الصعبة عبد

هى أيامنا كده

ناس بتيجى .. ناس تعدى

حلم غامق .. حلم وردى

يوم بيلمع .. يوم مصدى ..

يوم يجدد فيك أمل ...

يوم يزيد حلمك شلل ..

يوم يجرك للمهالك ..

يوم حنين .. هادى .. سالك

ذكريات بتروح و ترجع

شوق - بدون أسباب - بيوجع

ريحة حلوة فى اللى عدى ..

رغم إنه مش هايرجع ..

كل يوم بيمر فيه مليون حكاية ...

كل واحده - ليه ما تعرف - تنتهى نفس النهاية

و الحكاية مش كفاية ..

احنا و اللى معانا نحلم ... بس نفسى الحلم يكمل ..

نفسى أنام و أصحى ألاقى ...تانى يوم أجمل و أجمل

نفسى الف الدنيا و ارجع و فى إيديا الف شنطة ..

شنطة فيها بيت و أسرة..

شنطة فيها أمان لبكرة ..

شنطة بيها أنسى همى ..

و أحيى بيها أحلى ذكرى ..

شنطة فاضية ..

أرمى فيها حزن قاسى مش سايبنى من زمان ..

و فى بحور العمر أرمى الشنطة دى فى أبعد مكان ..

نفسى أقوم مالنوم ألاقى الف مفتاح بين إيديا ..

نفسى أنام و ارتاح شوية ..

نفسى أهرب من همومى ...

بس مش هاين عليا

الله عليك يا أسطى .... و بسم الله ما شاء الله ربنا وهبك موهبة عالية جداً في كتابة الشعر
أنا برضه نفسي زيك أنسى هموم الماضي و أعيش سعيد و أغمض و افتح الاقي بكره وردي بس زي ما ربنا قال ( أم للإنسان ما تمنى ؟؟ ) بس إن شاء الله ربنا يكتب لي و ليك و للجميع السعادة في الدنيا و الأخرة و راحة البال

علشان ما اطولش عليك .... تسلم أيدك و بجد شعر وصل لدرجة الإحتراف

فعلا كلامك حكم هو حال الدنيا كدا يوم فوق ويوم تحت مبترساش على حال ابدا
عجبنى كلامك قووووووووووووووى اللى وصفت بيه واقعنا واللى اتمنيت فيه امانينا
فعلا نفسنا لما نحلم حلمنا يكمل ونفسنا بكره اللى جاى نلاقيه اجمل واجمل
بكره يبقى بتاعنا احنا نشوف فيه احلامنا بتتحقق وكلامنا بيتصدق
بس انا مش متفقة معاك فى نقطة

اقتباس :: نفسى أهرب من همومى ...

بس مش هاين عليا

ازاى بعد كل اللى قلته وكل الاحلام دى يطلع العيب من جواك (اللى هو من جوانا) ويبقى احنا اللى مش هاين علينا نسيب الهم ونبعد عنه قال يعنى احنا اللى بندور عليه مش هو اللى ورانا ورانا .
ازاى مش هاين عليك تسيب همك وانت بتتمنى تشوف احلامك بتتحقق قدامك ؟؟!
ارق تحيـــــــــــــــــــــــــــــــــــــــــــــــــــــــــــــــــــــــــاتى وردة

فلـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــورندا geek

هايزنبرج .. نورت الموضوع وصاحب الموضوع ..
فلورندا ..اهلا بيكى
صدقينى الحياة ماتحلاش من غير هموم ... تحيلى كده حياتك من غير مشاكل ..كل حاجة ممكنة .. كل شىء متاح .. صدقينى مش ها يبقى للحياة طعم .. احنا أغلبنا مصابين بعقدة المزوخية .. اللى هى استعذاب العذاب .. لو ماكنتش عايش على أمل بتحاول توصللك و بتقابلك مشاكل علشان توصلله .. عمرك ماتحس بطعم الحياة

كلماتك واحساسك كالعادة رائع
وفعلا زي مابتقول الحياة مايكونش لها طعم من غير النقاش والزعل والنكد والمواجهة والهم رغم انه بيبقي صعب وكتير جدا بيهدنا لكن بنخرج منه اقوي
و كل يوم نزداد تجارب
تحفة يا اسطي