من هو عمرو خالد؟

[color=indigo][b]ينتمى عمرو خالد إلى أسرة مصرية، ميسورة، حصل على بكالوريوس تجارة من جامعة القاهرة عام 1988. وعمل بأحد مكاتب المحاسبة لمدة سبع سنوات، ثم افتتح مكتب محاسبة خاصا به ،وحصل على ليسانس الدراسات الإسلامية. ويعكف الآن على نيل درجة الدكتوراة في الإسلام والتعايش مع الغرب من جامعة ويلز ببريطانيا.

بدأ بإلقاء الدروس في نادي الصيد في حي الدقي في القاهرة، ثم انتقل إلى مسجد الحصري بالعجوزة ثم إلى مسجد المغفرة في حي العجوزة حتى ازدحم المسجد ولم يتحمل، فانتقل منه إلى مسجد الحصري في مدينة 6 أكتوبر، حيث ذاعت شهرته بقوة، وبدأ الشباب يحضر دروسه قادمين من أماكن بعيدة ، يُعتبَر رجل الأعمال السعودي الشيخ صالح كامل صاحب الفضل في إطلاق نجوميته عبر الشاشات الفضائية من خلال قناته الإسلامية اقرأ الفضائية .

وأعد وحاضر في مصر محاضرات عامة و لقاءات لمدة سنتين منذ 2000 وحتى 2002 ، ووصلت أعداد الحاضرين إلى 35000، هذا بالإضافة إلى دورات متخصصة لأكثر من 40 إعلاميا عربيا في بيروت في مارس 2003 .

يؤمن عمرو خالد بأنه لا نهضة من غير التمسك بتعاليم الدين الإسلامي، كما أن دور المسلم لا يقتصر على العبادة فقط من حيث الصلاة والزكاة، بل لا بد أن يكون للمسلم دور في النهضة التى يشهدها العالم الآن في جميع مجالات الحياة، سواء كانت العلمية أو السياسية أو الإجتماعية، خاصة بعد ما وصلت أحوال المسلمين إلى ما هي عليه الآن مما دفع عمرو خالد إلى تقديم برنامج أطلق عليه صناع الحياة داعيا فية الشباب العربي والمسلم إلى العمل والمشاركة في مشروعات تنهض بالبلاد العربية نحو التقدم مقدما العديد من الاقتراحات والمشروعات التى يمكن للشباب المشاركة فيها.

انتقادات

تعرض لانتقادات بسبب حصوله على أموال مقابل قيامه بالدعوة، وهو ما يراه الكثيرون محرما في الشريعة الإسلامية. إلا أن عمرو خالد قال إنه يتقاضى أموالا عن البرامج الدينية التي يقدمها ويتقاضى أموالاً من قناة اقرأ عن وظيفة إدارية يقوم بها في القناة ولايتقاضى اي مبالغ عن المحاضرات التي يقيمها في الساحة أو المشاركات في المؤتمرات أو الندوات الدينية. هذا وقد ذكرت مجلة "فوربز العربية" أن صافي دخل عمرو خالد في عام 2007 بلغ 2.5 مليون دولار.[3] ، وهو ما نفاه عمرو خالد في برنامج الطبعة الأولى مع أحمد المسلماني وحوار مع جريدة المصري اليوم قائلا "إن هذا الرقم هو رقم الاعلانات التي تعرض داخل برنامجه ولا يجني منها شيء" وهو "تحريف من المجلة" حسب قوله.[4]
تعرض لانتقادات من قبل علماء دين ودعاة سلفيين مثل أبي إسحاق الحويني ومحمد حسان ووجدي غنيم ومحمد حسين يعقوب وفتحي غريب وعبدالله بدر ومحسن عفيفي ومحمد عبد المقصود. وذلك نتيجة لما يعتبرونه أخطاء جسيمة تصل إلى حد الكفر، والاستهزاء بالرسول والصحابة في برامج عمرو خالد المسجلة وقد تم نشر هذه الانتقادات في كتب ومقالات وتسجيلات صوتية

عمرو خالد من بين الشخصيات 100الأكثر تأثيرا في العالم

أعلنت مجلة تايم الأمريكية عن قائمتها السنوية، والتي تضم أهم 100 شخصية هم الأكثر تأثيرا في العالم. وقد تم اختيار الداعية عمرو خالد ضمن أهم هؤلاء الأشخاص في العالم لعام 2007، معللة ذلك بتأثيره على المجتمع بنشاطاته الدعوية التي تخطت نطاق الوطن العربي ، ولدعوته المستمرة لنبذ العنف والطائفية والالتزام بالمنهج الوسطي في الدعوة. وتطلق تايم على هذه القائمة اسم الأشخاص الذين يشكلون عالمنا (The people who shape our world)، وتقوم مجلة تايم بإعلان قائمة أهم مائة شخص مع بداية شهر مايو من كل عام. وقد قبل عمرو خالد لحضور حفل التكريم الذي يضم المائة شخصية التي تم اختيارها لهذا العام، وألقى هناك كلمة قصيرة. [5]

والجدير بالذكر أن الأشخاص المئة يتم اختيارهم من بين 200 شخصية من المشاهير والأشخاص المؤثرين في العالم حيث يطرح 200 من الأشخاص لتصويت قراء المجلة، وتكون الشخصيات التي حصلت على أعلى الدرجات من القراء هي المائة التي يتم اختيارها. يذكر أن قائمة المائتين ضمت أسامة بن لادن وأيمن الظواهري والملا محمد عمر وأبو حمزة المهاجر (خليفة الزرقاوي)، إلا أن مثل هذه الشخصيات حظيت بدرجات منخفضة جداً لأنها شخصيات مكروهة من قراء المجلة. وتقوم التايم بتقسيم هؤلاء المئة ضمن مجموعات وقد تم وضع عمرو خالد ضمن مجموعة رواد الأفكار الجديدة

اولا باشكرك يا ليلي علي الموضوع دا
ثانيا انا باشكر الاستاذ عمرو خالد علي برامجه اللي كانت فعلا محببة الينا وكمان كلامه بياثر فينا وفي قلوبنا وعقولنا وتفكيرنا
وانا فعلا كنت من اشد المتابعين للاستاذ عمرو خالد
ووالدتي كمان بتتاثر بكلامه جدا لانه بيدخل قولبنا بجد
دايما كدة الانسان الكويس اللي عارف تعاليم دينه بيهاجم
رغم انهم مش عارفين بيهاجموه ليه
ولكن بيهاجموا بمبدا المهاجمة وخلاص
وبجد ربنا يوفقه يارب في اعماله الدينيه والخيرية
ويارب يجعل هذا في ميزان حسناته يارب
سلام

khjournalist كتب:: اولا باشكرك يا ليلي علي الموضوع دا
ثانيا انا باشكر الاستاذ عمرو خالد علي برامجه اللي كانت فعلا محببة الينا وكمان كلامه بياثر فينا وفي قلوبنا وعقولنا وتفكيرنا
وانا فعلا كنت من اشد المتابعين للاستاذ عمرو خالد
ووالدتي كمان بتتاثر بكلامه جدا لانه بيدخل قولبنا بجد
دايما كدة الانسان الكويس اللي عارف تعاليم دينه بيهاجم
رغم انهم مش عارفين بيهاجموه ليه
ولكن بيهاجموا بمبدا المهاجمة وخلاص
وبجد ربنا يوفقه يارب في اعماله الدينيه والخيرية
ويارب يجعل هذا في ميزان حسناته يارب
سلام

أستاذة خيرية ..... اتمنى انك تكوني بصحة و سعادة

بس حبيت اعلق على تعليق حضرتك و اتمنى إنك تتقبلي تعليقي

أنا بجد و الله العظيم كنت من اشد المعجبين بعمرو خالد و كنت زي غيري من الشباب الكثير اللي بيشوفوا إنه ما عملش حاجة و بيتكلم في كلام طيب و بيدعوا للإسلام و كنت باتهم اللي بيهاجموه بالتشدد أو الغيرة و الحسد علشان هوه ناجح و همه لأه ... بس بعد فترة طويلة من استخارة ربنا و التأمل في العلم الشرعي و قراءة كتب بتتكلم في أصول الفقه و عقيدة السلف الصالح و طرق تحصيل علم الشريعة لقيت إن الأستاذ عمرو خالد مش عالم في الدين يعني لا يحق له أن يدعوا لله بدون بصيرة و البصيرة شرط في الدعوة زي ما ربنا بيقول في الايه الكريمة ( قل هذه سبيلي ادعوا إلى الله على بصيرة أنا و من اتبعني ) و طبعاً ما ينفعش ناخد علم من شخص جاهل فيه ..

يعني مثلاً ممكن يكون أنا نيتي خالصه و نفسي اساعد مريض بس اكون مش مذاكر المرض بتاعه كويس فهل مثلاً اعالج أو اقعد اتكلم في الطب و اتفلسف و خلاص و اقول انا نفسي اساعد و لا اروح اتعلم و ادرس صح و اعرف كل المعلومات عن المرض و بعدين افتي ؟؟

طبعاً اتعلم الاول و بعدين اتكلم و اعلم الناس .... و الاستاذ عمرو خالد بيتكلم على الدين مش بأصول الدين لكن بأصول التنمية البشرية على اساس ان الدين ده طريقه علشان الواحد ينجح و يتفوق و يعيش مبسوط و الدين مش بالبساطة و السهولة ديه لأن في ناس قضت كل عمرها بس في دراسة الدين و تعلم شريعة الله

و ده راي شخصي على علمي القليل و أنا استغفر الله لو كنت غلطت في حاجة من اللي كتبتها في حق استاذ عمرو خالد و الله عز و جل أعلم

السلام عليكم ورحمة الله وبركاته

دكتور احمد .... اتمنى انك تكون بصحة وسعادة

بس حبيت اعلق على تعليق حضرتك واتمنى انك تتقبل تعليقى

معلش يا دكتور انا اقتبست المقدمة منك بس طبعا حقوق الملكية الفكرية محفوظة ليك
بالنسبة بقى لموضوع عمرو خالد

وده برده مجرد راى شخصى

بس عشان نكون موضوعيين خلينا نتكلم تحت بندين اساسين

ولان محدش فينا عارف طريقة دراسة عمر خالد فخلينا نفترض فى حال انه دارس وف حال انه غير دارس بالطريقة السليمة اللى ذكرتها

اولا خلينا ف لو انه غير دارس وان ما ينفعش ناخد العلم عن حد ماعندوش بصيرة على حد تعبيرك

بص يادكتور بداية كده عمرو خالد عمره ماقال عن نفسه شيخ على العكس ده احيانا رفضها
لان هو شايف انه ما بيقدمش الفقه والشريعة ف الاطار اللى بيقدمه المشايخ
يعنى دراسة الفقه والشريعة بالطريقة اللى ذكرتها يحتاجهم حد الناس بتستفتيه مثلا على سبيل المثال
اقولك اه ده لازم يكون دارس ودارس ودارس كمان
وع ايد مشايخ كويسين عندهم سند متصل ومتحقققين بكل المؤهلات اللى تؤهلهم ان الناس تشرب منهم علوم الدين
لكن عمرو خالد مابيعملش كده خالص
عمرو خالد انسان مسلم لا ازكيه على الله ولكنى احسبه على خير
حب انه يعمل حاجة للدين فبص حواليه لقى ان معظم مشاكلنا بسبب اننا بعاد عن الدين بزياد ة

ده غير ان حتى الناس اللى بتقرب بتبعد لان وببساطة مستوى المعيشة والجو المحيط عامل قلق

ولقى ان الناس يا اما بعيدة عن الدين تماما يا اما ايمانها غير مكتمل
يعنى واحد طول النار ف الجامع ده مش صح بالعكس
ناس بتكفر ف بعض من غير دليل
ناس كده عايشة وخلاص وزى ما تيجى تيجى
لدرجة ان فيه ناس واستغفر الله على اللفظ بس ده حصل
حست انها مخنوقة من التدين
والدين عمره ماكان عسر ولا عمره كان صعب
وربنا ما نزلش الدين ده الا رحمة بالعالمين
اوطبعا كانت المشكله ف نوع معين من الناس هما طبعا ع خير ان شاء الله بس فيه حاجات نقصاهم دينهم مايكملش من غيره
وغايب عنهم التصور الكلى للدين فشافوه يا اما عباده بس وصلاه وصوم وعبادات يا اما شفوه تطهير روحى وبس وهو ده المهم وخلاص مش مشكه اذا كنت اتحجبت ولالا ولا باعمل اللى عليا ناحية اهلى ولالا باتقن شغلى ولالا
وناس تانية نسيوا كل حاجة وما افتكروش غير الخلافه
وكل اللى همهم عمارة الارض ونسيوا الصلا وهما ف الشغل ماهو العمل عباده فاتقطعت الصلة بينهم وبين المولى ونسيوا يعملوا تطهير فبقم ماديين قوى

وكل صنف من دول نسى الدين ده كله من جزء واحد عشان يحس بمعنى الدين يسر
ويدوق طعم السعادة الحقيقة
وعمرو خالد اشتغل ع الحتة دى
عمرو خالد من البداية مالعبش دور الشيخ قد مالعب دور الواعظ
اللى بيشدك للطريق عشان انت تختار وتكمل
عمرو خالد اللى مش عاجب بعض مشايخ الفضائيات واللى بدل ما بيحاولوا يصلحوا اخطاؤه بطريقة تفيد الكل وحولولها
لماتش مستينن فيه ليه على غلطة لمجرد النيل منه
عمل اللى الناس دى ماقدرتش تعمله ف سنين
وهو انه يقول للناس انتو فاهمين الدين غلط
الدين مش حاجة تقيلة وصعبة الدين سهل
واللى بيحاول يعرفربنا بيساعده وبياخد بايده
وان كلنا ممكن نعيش بيه وعشانه
مش لازم يكون ليك شكل معين عشان تكون من الناجيين
زى ما البعض بيدعى وكره الناس ف طريق ربنا

يعنى يا دكتور بالمثل اللى انت استخدمته هو يمكن يكون مش دكتور
بس هو مسعف دارس اسعافات اولية كويس بيعملها للمريض لحد مايجى الدكتور واللى من غيرها ممكن المريض يموت او ع احسن الفروض حالته تتدهور

والناس اللى بتهاجمه ديه انا ماليش انى اقول مقاصدها بس خلينا نقول اننا لازم نحسن الظن وان الناس دى ان شاء الله قصدها خير

بس عبرت عنه بمنكر

تعرف يا دكتور انا مرة كنت باعمل بحث
ولقيت فيديو لعمرو خالد
وله تعليقات وكده
وطبعا فيديو ع طريقة ولا تقربوا الصلاه جايبين الكلام وده مش عارف كفر بالله بيكفروه وهما حتى مايعرفوش نيته
كان اسلوب اقل مايقال عنه انه رخيص ومتدنى وماينفعش رجال دين ايا كان يعملوا كده
المهم
دخل واحد مسيحى وقال للمسلين لما تبقوا تحلوا مشاكلكم بتاعة الشيوخ ابقوا تعالوا كلمونا عن الدين الغلط والدين الصح
ازاى بقى المسلمين يسكتوا
دخل واحد مسلم
ربنا يسامحه يارب
قعد يشتم ف الولد بالفاظ مش لطيفة
وياريتها خلصت على كده
شتايمه دى اتمدت ووصلت للسيدة مريم ولسيدنا عيسى عليهما السلام
ده المسلم للاسف

بس احب اقولك حاجة يا دكتور زمان ايام الاندلس كانت الناس بتدخل فى الاسلام بالالالف من غير حتى مايكونوا عارفين لغة المسلمين
عارف كانوا بيدخلوابايه
بالحال
كانوا بيحسوا السكينة مع المسلمين كانوا بيحسوا بربنا وهما وسطهم رغم انهم ف غفلة تامة وده اللى خلاهم دخلوا الدين
وكويس انك ذكرت البصيرة لان البصيرة مش العلم الشرعى المجرد
البصيرة خليط لتلت حاجات مهمة جدا
العلم الشرعى
والحال لقلبى
والالمام بظروف العصر والمجتمع

والانسان يا دكتور عايش عشان يتعلم ويفضل طول عمره يتعلم عشان ف النهاية يكتشف انه اجهل الجهلاء لان مفيش حد بيلم باى علم حياتى
فمابالك بالعلوم ادينية
ودى بتبقى توفيق من ربنا واجتهادات لان مفيش حد ملم بالعلم بالطريقة اللى انت متخيلها حتى لو قضى عمره فيه

وموضوع انه بيقول ان الدين طريقة للنجاح فاسمحلى ده مش صح
لان النجاح شرط من شروط الدين انت لو عايز تكون متدين حقيقى لازم تنجح ف حياتك لانك بتبقى عارف انك بتتحاسب على كل ثانية من عمرك ده غير ان نجاحك ده للدين ككل والحبيب عليه افضل الصلاه والتسليم بيكون فرحان بيك وانك واحد من امته لانك اعليت من شأن الامه وده اللى عمرو خالد بيحاول يوصله للناس انه يوم ماينجح ماينجحش عشان النجاح يوم ماينجح يكون ناجح لله
والحقيقة بقى يا دكتور ان ربنا فعلا اوجد الدين طبعا لحكمة لا يعلمها غيره سبحانه بس هو قالنا ان الدين هو طريقنا الوحيد للسعادة ف الدنيا والاخرى

وماتنساش لا شادد الدين احد الا غلبه والدين متين فلازم لما نحب نوغل فيه نوغل فيه برفق
وربنا بيطوع المعلومة للى يصطفيه والدين اسهل مما انت فاكر لانه لو كان صعب ماكانش ربنا فرضه ع الناس
لان الانسان اصلا خلق ضعيف فلازم الدين يكون يسر عشان يناسبه

انت رايح فين

لسة الشق التانى
انا لسة ماخلصتش رغى ع فكرة

الاحتمال التانى بقى يا دكتور انه يكون فعلا دارس وعالم ومش شرط عشان الواحد يكون عالم انه يتكلم لغة عربية بالعكس من الذكاء انك تكون بسيط بالذ1ات ف الدين
وماحدش ينسى الشعراوى وقد ايه ع الرغم من علمه وزى ما قلت لا نزكيه ع الله وانما نحسبه ع خير كان انسان بسيط جدا وبيتكلم لغة ابسط

القران نفسه ربنا كان قادر انه تكن لغته صعبة لكن ربنا اختار لغة سهلة الكل يفهمها ويحسها

الدين مش زى ما ناس متصورة قاصر على شكل معين الدين واسع وشامل للكل

معلش انا رغيت جامد اكتر من العادة
فتحت ع الرابع يعنى
بس ع فكرة الموضوع ده مهم جدا
لانه بقى اشبه بالثقافة العامة

انا طبعا فاهمة قصدك وعارفة ان ده رايك من غير تجريح ف حد
بس انا قصدى ان كمان الاحكام على الناس شىء صعب جدا
لانك بتتعامل مع نفسيات لا يعلمها سوى الله
حتى اصحابها اوقات بيكونوا مش عارفينها

ع العموم انا كمان قلت رايى وطبعالو فيه شىء مغلوط فهو غير مقصود

تقبلوا مرورى وفائق احترامى

سلام عليكم

أستاذة أيه ... تعليقك جميل جداً و أكثر ما شدني فيه هو اسلوب الحوار الراقي اللي اتبعتيه في الخلاف مع وجهة نظري
و يا ريت كل الناس في الخلافات الفكرية و في اختلاف وجهات النظر ياخدوا طريقتك في التعبير و الحوار و بجد بجد اتوقع ليكي مستقبل باهر إن شاء الله بعد التخرج
و بالنسبة للاستاذ عمرو خالد فربنا اعلم بالنيات و أجهل الناس من انشغل بالناس و نسي نفسه .. أنا عن نفسي إنسان قليل المعرفة في الدين و قليل العلم و بلا شك لم أبذل ربع أو حتى جزء من مليون جزء مما بذله استاذ عمرو خالد في الدعوة إلى الله و ما تحمله من مشاق و مضايقات حكومية بسبب برامجه و كتبه ... و ما قلته كان راي شخصي و لأن الكثير من علماء الإسلام قديماً و حديثاً حذروا من البدع و من القول على الله بغير علم ...

أنا بس ححكي ليكي قصة حقيقية حصلت ايام النبي عليه الصلاة و السلام لما نزلت أية (( اتخذوا احبارهم و رهبانهم أربابا لهم من دون الله )) جاء أحد أهل الكتاب و قال لرسول الله : نحن لا نعبدهم !!
فقال له رسول الله صلى الله عليه و سلم : الم يحلوا لكم ما حرم الله و يحرموا عليكم ما أحل الله فأطعتموهم في هذا , فتلك عبادتهم ... أو كما قال صلى الله عليه و سلم ..د

من هم الأحبار : هم علماء الدين أو المشايخ زي ما قلتي عليهم
و من هم الرهبان : هم الناس اللي بيحبوا ربنا جداً لدرجة إنهم ترهبنوا و إعتزلوا حياة الناس و زادوا على نفسهم في العباة و افتوا للناس و دعوا لله على جهل لأمتلاكهم النية الحسنة لكن قصور علمهم ...

و أعتقد إنك أكيد تسمعي عن جماعة الصوفية اللي كنت بحبهم زمان و ربنا تاب علي و هداني و بعدني عن طريقهم و كان لحضرتك فضل كبير بعد ربنا لم علقتي و نصحتيني على مقال (( الشطح )) اللي أنا نقلته للمنتدى هنا ... شوفي دول برضوا بيدعوا لله على جهل و بيحبوا الله بجد و بإخلاص كمان بس جهلهم في الدين خلاهم يتخذوا طرق غير شرعية لعبادة ربنا ...

خلاصة الموضوع ربنا يهديني و يغفر لي إن كنت ظلمت أستاذ عمرو خالد و في النهاية إختلاف وجهات النظر لا يفسد للود قضية

و بكرر شكري ليكي لأسلوب حوارك الراقي و أنا في انتظار ردك

السلام عليكم ورحمة الله وبركاته

اولا انا اللى باشكرك جدا يا دكتور انك قريت كل اللى كتبته
لانه فعلا كتير
ثانيا برده انا اللى باشكرك جدا لانك تفهمت رايى وكمان فتحت باب مناقشة موضوع ف رايى هو موضوع مهم جدا

وشكرا تانى ع موضوع المستقبل الباهر ده
ولو ان الواحد خلاص تمت وبقى فى عداد العاطلين العالة ع المجتمع بمعنى ادق
وربنا يستر وما نفضلش كده كتير
وطبعا انا معاك جدا فان اجهل الناس من انشغل بالناس ونسى نفسه

لان الملتفت لا يصل

والافلاس هو الانشغال بالناس

وطبعا حدود علم اى حد فينا لا تذكر بجانب حد تعب وسعى حتى عمرو خالد نفسه اكيد حدوده المعرفيه اقل مع حد تانى يكون اكثر علم وهكذا

بس كمان لو انا هاستقى معلوماتى من مصدر معين لازم اكون واثقة فيه
يعنى لو عايزة اتعلم صحافة بجد هانقى صحفى كويس وجرنال كويس عشان اتعلم صح وده علم حياتى مهما بلغت اهميته مش هتبقى زى اهمية العلم الخاص بالدين
فعشان كده انا لازم انشغل بمصدرى عشان اتاكد انه مصدر موثوق اقدر اامنه على عقلى وجدينى لانه هو اللى هيشكله بالذات ف المرحلة السنية اللى احنا فيها لسة الشخصيات بتتشكل فلازم المصدر والمشكل يكون موثوق فيه

وطبعا اصلا لا نكران فى الاراء
يعنى ماينفعش تقولى ده رايبك واقولك غلط لانه لو رايى شخصى فمينفعش اقول ان رايى الصح لانه ف النهاية مجرد راى
وطبعا البدع من اخطر الحاجات على الانسان خاصة ف العصر الحالى يعنى كل اللى عايز يفتى يفتى واللى عايز يفتح قناه بيفتح ومن غير حدود وطبعا بدات تظهر بدع كتير
بس المهم نكون عارفين كويس يعنى ايه بدعة وموقف الائمة الاربعة اللى فسروا لينا ا لدين لان فيه بدع مستحسنة وبدع مستقبحة بس بعيدا عن ده لان ده ش موضوعنا
وانت عارفينى ممكن ارغى للصبح

بس شايف المثل اللى انت قلته كانوا بيحلوا ليهم الحرام ويحرموا الحرام
يعنى تحدى صريح لاوامر الالهية

لكن اعتقد ومعلش خلينا نعمم الفكرة ومش تبقى قاصرة ع عمرو خالد بس

الدعاه الجدد مش بيعملوا كده
هما بس مختلفين شكلا عن الشكل اللى اعتدنا عليه
وطريقة عرضهم مختلفة لكنهم بيقدموا نفس المضمون اللى بيبقى موثق من مراجع وكتب ف الفقه والشريعة وكتب للائمة الاربعة
وطبعا انا مش بادافع عن حد
لان مفيش حد ف وضع اتهام
بس ده نوعا محاولة للعمل بقوله تعالى

الذين يسمعون القول فيتبعون احسنه

لان زى ماقلتلك قبل كده ممكن تكون نفس الفكرة حد اقدر من التانى انه يوصلها لقطاع اكبر
الحد ده بقى لما يدخل الدين ويعرف الطريق يبتدى يعمل زى ما نت عملت كده يقرا اكتر ويوسع مداركه اكتر
ويقرا للكل لحد مايبقى ليه ه فكره الخاص بيه

مش بيقلد حد ولا زى حد
بس انسان مسلم فقط لا غير
من غير تصنيفات ولا انا من المتدينين ولا من لاخوان ولا سنه
دى كلها تصنيفات ف راىى ابتدعها اصحابها
لكن التصنيف الاوحد لينا هو اننا نكون مسلمين
رسولنا ماعلمناش حاجة تانية
ولو كان فيه حاجة تانية هو امن حد علينا ولو فيه اى خير ممكن يكون لينا كان هو قاله
بالعكس التصنيفات ديه قسمتنا وضعفتنا وكرهتنا ف بعض
وتعرف حالة الرهبان دى موجوده فيه ناس كده ربنا هداهم ووصلوا لحالة معينة من الورق ربنا ياربيقسمه لينا جميعا
بس مشكله الناس دى انهم فرضوا الورع ع الناس فتقلوا عليهم الحمل وحملوهم فوق طاقتهم وربنا ماقالش كده
وبالتالى ناس كتير تعبت وخرجت بعد ماكانت وصلت لمرحلة كويسة قوى مع ربنا ب ماقدرش يستحمل لانه اتفرض عليه نوع معين من الدين والشكل والمضمون هو كان اجتهادات لبعض الناس اللى زى ماقلت دعوا عن جهل بحملوا الناس فوق طاقتهم
اما موضوع الصوفيه ده ومع اختلافى مع انوع منهم الا ان زى ماقلت انا مش مقتنعة بالتقسيمات دى
والتزكية العاليه اللى بتدعوا ليها الصوفيبه ياريت كلنا نعملها هى مش مفروضة وربنا مش اسمها للكل لانها ممكن تضر بناس لكن اننا نوصل ليها كويس بس ماينفعش نعتمد عليها لوحدها ولازم ننظر للدين بنظرة اشمل من كده

وصدقنى انا ماكانش ليا دور ف حاجة
انت كنت بادور ع الحقيقة والصح واللى بيدور ربنا بيعينه وبياخد بايديه لبر الامان لان ربنا اصلا بياخد بايدينا واحنا بنعصيه فاكيد لما هنحب نرضيه هيساعدنا اكتر
وانت كنت عايز توصل عشان كده ربنا ساعدك
مش هو بيقول
والذين جاهدوا فينا لنهدينهم سبلنا

وبرده خلاصة الموضوع عشان عارفة انى طولت محدش بيلومك ولا حتى ليه حق انه ينكر عليك رايك
وان شاء الله ماتكونش ظلمته ولا حاجة بس الفكرة زى ما قلت انى حاسة ان موضوع النقد بالذات لعمرو خالد بقى ثقافة عامه
واحلى حاجة ف دينا ان الاختلاف فيه رحمة وسعة
لانه واسع وشامل اكتر ما احنا نتصور

وانا سعيدة جدا لانك فتحت الموضوع للمناقشة لانه فعلا مهم

ولو حابب تكمل المناقشة طبعا دى حاجة تسعدنى

تقبل مرورى وفائق احترامى
سلام عليكم

لا تعليق؟؟؟؟؟؟؟؟؟؟؟؟؟؟؟

بعد هذه الردود الطويلة جدا

ربنا يهدي عمر خليد

يااااااااااااااااااااارب