كراكيب .. نحن هنا يا خوخة

محبوس فى جوفك كام سؤال ..؟
الصبر طال ..
والبخت مال ..
و العمر ضاع من غير جدال ..
دوّر عليك ..
هاتلاقى نفسك لسه مسجون فى الخيال ..
هاتلاقى حلمك شىء محال ..
هاتلاقى نفسك باكى و فى نفس المكان ..
و الهم جوا القلب ماينعد ..
المساحة ضيقة .. و الهوا عالأد ..
الطرق متعشقة .. و الحوارى سد ..
و هانعمل إيه ..؟
ماهو جيلنا من بين البشر مكتوب عليه ..
يحزن كتير .. يفرح قليل ..
يحلم فى يوم يتهنى بالعشق الجميل ..
ينده على الحلم البعيد ..
لكن يقرب .. مستحيل ..
ينسج أمانى بالسراب .. أيوة السراب ...
ماهو بردو أحسن من مافيش ..
و فى لحظة يصحى عالحقيقة المؤلمة ..
كل الأمانى بقت خراب ..
كل الأمانى ماتساويش ..
نفسك فى يوم توصل لشىء ..؟
روح موت عشان تقدر تعيش ..
و الحل إيه ..؟
منديل ورق .. غرقان عرق ..
بيشد فى خناق الزهق ..
و ساعات تعب ما بتنتهيش ..
و ياريت يفيد كل الألم ..
عشان تعيش من غير هموم ..حاول تعيش زى الصنم ..
إنسى اللى جاى و انسى اللى فات ..
إنسى الصور و الذكريات ..
قضى سنينك من سكات ..
و كأن قلبك - رغم نبضه العالى - مات ..

يانهااااااااااااري عالكلمات
بجد كلمات قريبة مننا كلنا
قريبة مني ومنك ومن شباب كتير العيب الوحيد فيهم انهم بيحلموا
احلام استحالة تتحقق او احلام ممكن تتحقق لكن في زمنا دا برضة استحالة تتحقق
الا مايكون العمر فات وعدي
ويكون الواحد خلاص حلمه اتحول لسراب
علشان يلاقيه يرجع لنقطة الصفر ويدور عليه تاني
او يطلع عينه ويتجرح ويتشتم ويتبهدل لغاية مايحقق ولو حاجة بسيطة
ودا لاننا عايشيين في دنيا العجب
بس انا شخصيا هاحلم وهاحلم وهاحلم
لان اللي زينا مايعرفش غير انه يحلم
حتي لو كان محال زي ماقلت

بس صحيح يا اسطي
العمر فات ازاي باه
العمر لسة قدامك
وربنا يقويك يارب وتحقق كل اللي تتمناه

ومنتظرة كل كتاباتك
وماتتاخرش علينا تااااااااااني
يلا سلام

السلام عليكم ورحمة الله وبركاته

عودا احمد

حمدالله ع السلامة يا اسطى

وطبعا زى ما عودتنا دايما

كلام جميل

يمكن الفكرة انا مختلفة فيها شويه

بس فى النهاية يفضل برده الاسطى احسن حد بيكتب عامى ف المنتدى

تقبلوا مرورى وفائق احترامى

سلام عليكم

خوخة ... آية .. يادى النور يادى النور ...
صدقينى يا آية دى مودات ..
و أكيد بتعدى ..
لكن مهما اختلفتى معايا ..
لازم فى يوم هاتمرى بنفس الإحساس ...
لأى سبب ..
أو حتى من غير سبب ..
لكن الفرح و الحزن دايما واردين فى كل الظروف ..
تحياتى