الشاعرة ايمان بكرى (مفيش حاجه)

الشاعرة ايمان البكرى

مفيش حاجة

مانيش عايزة خلاص حاجة
ولا محتاجة انا لحاجة
ولو عايزة صحيح حاجة
مخليتوليش ولا حاجة

عموماً بصوا فيه حاجة
هقولها بس محتاجة لعقول تفهم
ولو حاجة
مهيش مفهومة او حاجة
نفسرها بكام حاجة
نوضحها بكام حاجة
وأهى حاجة مع حاجة
هتظهر وتبان لنا حاجة

وانا ما بخفش من حاجة
مانيش مسنودة ولا حاجة
لكن ما بخفش من حاجة
لكن فرضاً لو هقول حاجة
هيحصل إيه ؟؟؟ ولا حاجة
هيعملوا إية ؟؟ ولا حاجة

و بعد الشر بعد الشر لو واحد من القاعدين
من السامعين من الضالين
فِهِم حاجة هَيعملوا إيه ؟؟؟؟
اكيد برضُه ولا حاجة

فنتوكل على الستار لوجه الله نقول حاجة

فيه ناس بتعيش علشان حاجة
وناس بتموت علشان حاجة
وناس بتموت على الحاجة

وناس تديلك الحاجة
وتبقى ليها محتاجة
وناس تديلك الحاجة
و تاخد ادامها ميت حاجة

وناس تكبر تكون حاجة
و ناس تصغر علشان حاجة

وناس منظر ومش حاجة
وتلقاه كبيرحرس ونفير عليه منظر
وهو جبان وشيخ منصر
ولا يبـنش عليه حاجة

كلامى يا خلق فيه حاجة؟
لحد دلوقتى فيه حاجه؟

كلام عادى وبسيط جداً ولا فِهشِ ولا حاجة
ما انا ما أقدرش أقول حاجة
صحيح نفسى أقول حاجة وميت حاجة
لكن مش قادرة اقول حاجة

لأنى لو هقول حاجة
هييجى ناس بتوع حاجة
وياخدونى ورا الحاجة

وهو لو سمع حاجة
هيعملوهالى ميت حاجة

عموما بصو لو واحد من القاعدين
عاوزنى أبلغه بحاجة
يقول مايخفش من حاجة

نعم فيه إيه؟
لالالالالأ مافيش سرقه
ولا تهليب ولا تهريب ولا حاجة

وبتقول إيه
مصمصوا إيه؟ وخصخصوا إيه؟
ده كله كلام مفيش حاجه

قضية إيه؟
ياشيخ روح خلاص مافيش حاجه

حرامى إيه ؟ ولَكّح إيه؟وهرب إيه؟
شــفـافـيـه ومافيش حاجة

وبتقول إيه؟لالالآلأ عـــيب
لافيه تدليسولاترقيص
ولا تدبيس ولا حاجه

سمع مع هووووس
انا حاسسة انه فيه حاجة

دقيقة سكات لَتبقى حداد
انا حاسسه انه فيه حاجة

زمنكوا ياخلق فيه حاجة
ولازموا كام وميت حاجة
ده لو يعنى إذا كان فيه حاجة
انا عن نفسى مش حاسسة ولا بحاجة
ولا متضايقة ولا حاجة

سعادتك برضه مش زيـى مافيش حاجة ؟
أهـه بيقول مافيش حاجة

جنابك برضه مش زَيـىِ وعلشان زيي مافيش حاجة
أهـه بيضحك بيقول مافيش حاجة

ما أنا قولتلكو من الأول مافيش حاجة

عليا النعمه يا اخوانا مافيه حاجة
ورحمة ابويا ويا أبوك على إللّى جابوك ما فيه حاجه

وعهد الله . وعهد الله. وعهد الله
ما خللولنا ولا حاجه

بقلك ايه خلاص خلص و فركش
يلا يا اخونا مفيش حاجه

الشاعرة المصرية : إيمان محمد بكري محمود

اقولك اية واعدلك اية
اكيد اكيد ولا حاجة
بصراحة ومن غير حاجة
عجبتني اوووي من غير حاجة
وانا باشكرك يا بوسي علي اضافتها
لانها فعلا فعلا بتقول كلام كتير اوي اوي علي لسانا جميعا
بس فعلا ابدعت الشاعرة ايمان
ومن غير مااقول اي حاجة
لنروح ورا الحاجة علي رايها
انا باحب بابا حسني وماما سوزي والحكومة واجدع سلام ليها
لانها فعلا منصفة جدا
وبتدي كل واحد حقه
واللي موفرة الشغل للشباب
واللي متاكدين ان بعد مانخلص اللي هو بعد 4 شهور مش هانتعد من العاطلين لاء هنلاقي الشغل مستنينا
بجد بجد ومن غيرحاجة
تحيا جمهورية مصر العربية الديمقراطية

سلام

هى فعلا الشاعرة ايمان ابدعت وهى بتقول الشعر دا وكمان احسن حاجه انها بتتكلم باللغه العاميه اللى احنا بنتكلم بيها وبتقول فعلا اللى احنا بنقوله وبنعمله

وبعدين تعالى هنا انتى بتقولى بابا مين وماما مين
وحياتك عندى لو هعيش من غير اب وام هيكون احسن من انى اعيش مع الاتنين دول
ههههههههههههههههههههههههه
اة تحيا جمهوريه مصر العربيه الدكتاتوريه بقى ديمقراطيه مين والناس نايمين
وشكرا على ردك يا قمر

هسسسسسسسسسسسسسسسس
بتقولي اية
ديكتاتورية
كلام في سرك يا بنتي
ماتقوليش لحد
احسن تروحي ورا الشمس
لنكون متراقبين