امتحان اللغة العربية بقلم أشرف توفيق

السؤال الأول: التعبير
اكتب ما لايقل عن 650 سطر فى أحد الموضوعات التالية
لم يجد الطفل غير الشارع ملجأ نظرا لحالة البلد الهباب..فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو.. اكتب قصته مع تسليم الحِرز للباشا مراقب اللجنة

شهدت بلدنا الحبيبة نهضة فى مجال التشييد والبناء وخصوصا بعد وصول سعر الحديد إلى 6500 جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل فى حديد عز

بعد انتشار ظاهرة أكل لحم الكلاب والحمير..من وجهة نظرك كحمار تكلم عن هذه الظاهرة ومن المتسبب فيها بدون غلط..الورق متراقب
ـــــــــــــــــــــــــــــــــــــــــــــــــــــــــ
السؤال الثانى: القصة
من قصة " وعهد الله ما انت داخل الانتخابات" .. اقرأ القطعة وأجب عن الآتى
ثم أتى إليه وضربه بالجزمة وقال: انت عايز تترشح فى الانتخابات يامعفن؟؟ دانت عايز معجزة..مش كفاية بتاكلوا لحمة ومستورين.. عايزين إيه تانى؟
ما هى اللحمة؟ أو على الأقل حدد أقرب معنى خيالى لها

مرادف معجزة فى اللغة ( تغيير وزارى – زيادة المرتبات – رغيف العيش) اختر يا مقلول البخت

لماذ ضربه الرجل بالجزمة وليس بالعصى مثلا؟؟
أهو كسل .. لسة هيرفع العصاية؟ - عشان العصاية قلة قيمة برضه واحنا فى عصر الديمقراطية – عشان العصاية شغالة بس مش فى الضرب.. افهم انت بقى اختر

حلل بمزيد من التفصيل جملة ضربه بالجزمة ومدى توافقها مع جملة مصر بتتقدم بينا
ــــــــــــــــــــــــــــــــــــــــــــــــــــــــــــ
السؤال الثالث القراءة
من موضوع ( الزعيم..والفنان.. والقدوة) اقرأ القطعة وأجب
وقد نفى الزعيم عادل إمام الإشاعات التى أكدت أنه مرشح لوزارة الثقافة.. وأكد أنه فنان فقط وليس سياسيا الخبر حقيقى كما أنه يرحب بالتوريث ومقتنع بكل سياسات الحكومة
فى رأيك هل يصلح عادل إمام لوزارة الثقافة أم لوزارة الصناعة باعتبار أنه صرح فى فيلم السفارة فى العمارة أنه بيحب المَكَن؟؟
ذكرنا فى الدرس أن عادل إمام سيتقاضى فى فيلمه القادم 12 مليون جنيه.. فى رأيك ياعم المحروم تبقى البوسة بكام فى الفيلم؟؟

دخل كاتب هذه السطور مسرحية بودى جارد للزعيم رغم قرفه منه أساسا.. فى رأيك ما السبب فى دخوله؟
أكيد معزوم – طبيعى معزوم – وربنا معزوم.. اختر على أن تضع إيدك على المصحف وانت بتحلف للمراقب بتاع اللجنة
ــــــــــــــــــــــــــــــــــــــــــــــــــــــــــــــ
السؤال الرابع النصوص
أجب عن أحد النصين الآتيين
من نص ( ماشربتش من نيلها)..اقرأ ثم أجب
ماشربتش من نيلها.. جربت تغنى لها.. جربت فى عز ماتحزن تمشى ف شوارعها وتشكى لهابعد رغبة صاحبة النص فى أن تلد ابنتها فى أمريكا لتحصل على الجنسية الأمريكية..اختر..ما المقصود بنيلها فى النص؟
المسيسبى - الأمازون – يونج يانج

هذا النص من نصوص الحزب الوطنى والدليل وجود اسم مهم من قيادات الحزب فى النص.استخرج الاسم..وبوسه من بُقـُّه ورجَّعُه مكانه

أكمل الأبيات إلى آخر كحكة فى الكليب

قوبل النص بانتقادات بسبب بعده عن الواقع..وضح من النص ما يتفق مع القول المأثور اطبخى ياجارية .. كلف يا سيدىـ
ــــــــــــــــــــــــــــــــــــــــــــــــــــــــ
من نص (حين ميسرة)..أجب عن الآتى

اذكر اسم مصيبة واحدة محصلتش فى النص الأسود ده

وضح عبقرية أحمد بدير الإرهابى فى النص وهو يكتب رسالة على الكمبيوتر باستخدام أزرار الأرقام فقط ومفيش حروف.. ويعطى أمر التنفيذ بزرار قايمة ستارت مش بإنتر.كمبيوتر إرهابى بقى

فى نصى ويجا وخيانة مشروعة وضح خالد يوسف هستيريا الجنس فى الطبقات الغنية.. وفى نص حين ميسرة وضح خالد يوسف هستيريا الجنس فى الطبقات الفقيرة..عشان خطرى.. اذكر مع كامل البيانات أماكن هذه الهستيريا فى المعادى
سبب وجود الشرطة كل خمس دقائق فى النص
موسم ترقيات عقبال أملتك ولازم شغل – أخو خالد يوسف ظابط ولازم يخدم أخوه – عشان الشرطة بتراقب قسم البوليس اللى جنب أحداث النص اختر
ـــــــــــــــــــــــــــــــــــــــــــــــــــــــــــ
السؤال الخامس النحو
أعرب ما تحته خط.. لو مالقيتش القطعة أصلا ..اتصرف
ذهب الرئيس إلى المؤتمر .. ضع الجملة السابقة فى صيغة المثنى.. ماعدا الرئيس طبعا ياكلب كان ممدوح إسماعيل قاتلا .. ضع إن مكان كان.. على ألا تنصب ممدوح.. عشان هوه بينصب لوحده
فُرِضت الضرائب علينا ببشاعة ..أعرب الجملة .. وارفع الضرائب أبوس إيدك
ــــــــــــــــــــــــــــــــــــــــــــــ
السؤال السادس الخط
(كوز المحبة انخرم..طرطش على كمى..ياحبيبى بطل جفا وارحم عذاب امى)

اكتب الجملة السابقة ثلاث مرات بثلاث خطوط.. موبينيل وفودافون واتصالات..كما يمكن التحويل من خط لخط بنفس الرقم.. فقط اتصل بخدمة العملاء

ملحــــــــــــــــــــــــــــــــــــــــــــــــــــــوظة هامة جدااااااااااااا
وربنا ما انا اللى كتبت الموضوع ياباشا دا عيل صغير حدفهولى وجرى حتى أسال الفيس بوك وهو يقولك
احلى سلالالالالالالالالالالالالالالالالالالالالالام
فـــــــــــــــــــــــــــــــــــــــــــــلورندا.

ههههههههههه
اية الكلام الكبير دااااا
اية اللي بيحصل دااااااااا
دا امتحان عربي اومال لو اجنبي هيبقي اييييييييييية
كل اللي في الموضوع دا حقايق
وبيوضح حاجات كتيرة بتحصل حاجات كلها غلط في غلط
احنا اصلا مابقناش نعرف الصح اية علشان نعمله
بجد الموضوع كله هايل واللي كاتبه كمان واحد ربنا يكرمه عارف مصر واولادها علي حقيقتها المرة
وكمان فيه كذا حتة عجبوني جدا لدرجة اني زهقت من الضحك بس مش علشان فرحانة بالكلام
بالعكس مصر راحت في داهية
ولو ماحصلش وقفة علي اللي بيحصل فيها دا
مصر هتروح
لاننا بنقول مصر دي امي
لكن دلواتي بقت صديقتي او صديقي او اخويا او اختي اللي ممكن يغدر بيا
وبارجع واحنله تاني

يعني ماقدرش استغني عنك يا مصر
وتعيشي واولادك يخربوا فيكي
وينهبوا فيكي
ويسرقوكي
ويحرموا شبابها من حقهم الاساسي فيكي




واخيرا اشكرك فلورندا علي النقل دا
فعلا موضوع هايل
سلام

هههههههه
الموضوع دا هلكني من الضحك
حلو قوي
وانا متاكد انك انتي مش اللي حطتيه وانتي بتاعت الكلام دا
شكرا فلورندا الموضوع

سامحينى يا فلورندا ..
بس ..لأنى انا كمان بعانى من كدا
لو سمحتى تعدلى الموضوع .. لو ينفع ..
و تنوهى فيه إنه منقول ..
من الكاتب أشرف توفيق ..
صاحب مدونة أخف دم ..
لأنه بالفعل بيتضايق من دا ..
و على فكرة .. الموضوع دا كمان اتنشر فى جريدة الدستور بتاريخ 25/6
عموما أنا عارف إنه غير مقصود
و ممكن كمان تكونى مش عارف مين اللى كاتبها
لكن .. داواجبى يعنى .. لازم أقول ..
لأنى يهمنى إنك ماتكونيش من الناس اللى بيتقال عليهم "سارقين مواضيع " ..