قلة أدب ..!! - أحمد مطر

السلام عليكم ورحمة الله وبركاته


مش عارفة لو كنت فهمتها صح ولا غلط

بس لما قريتها ولدت جوايا مشاعر مختلطة

والاهم انها صحت جوايا ذكريات مش عارفة اذا كان لها علاقه بيها ولا لا

فكرتنى بكل الكلام القيم اللى يدرج طبعا تحت قمة الادب

من امشى جوة الحيط من تحت وكلمة مميزة جدا ف الجامعه لما كنا بنعمل المجله اهم حاجة ما تكتبوش ف السياسية ولما جينا نناقش الراجل كان عايز يطلع لنا الملف بتاع مجالس التاديب

حتى الشغل قعدوا يقولوا كل واحد يكتب ما بداله اهم حاجة ما حدش يقرب م المنظومة الرئاسية مع ان التملق شغال مع بتوع المجلس المحلى عشان المصالح طبعا


بس تعرف انت حتى لو بقيت مؤدب واتبعت كتيب التعليمات مش هتسلم



افتكرت لما اخويا اتطلب ف امن الدوله لانه ف يوم بعد صلاة الجمعة وقف جنب واحد صاحبه من وهما صغيرين


عارف تهمة صاحبه ايه


انه بيروح جامع عندنا


مع العلم ان الجامع ده انصار سنه مش اخوان ولا حاجة


واتعمل له ملف ف امن الدوله رغم ان اخويا ابعد ما يكون عن الاخوان


وعمره ما اتكلم ف السياسه

ولا حتى اتفرج على مظاهرة من بعيد


عارف احنا هنا ف البيت عملنا ايه


بقينا نحرق كل حاجة اى حد اخدها عادى مكتوب عليها الاخوان المسلمين لحسن حد يجى يفتش


انت عارف يعنى ايه تحرق احاديث وكتيبات قران بايديك


قادر تحس يعنى ايه تتخلص من كلام ربنا زى ما يكون تهمة


على فكرة اوقات كتير قوى باحس اننا متهانين ف البلد دى


بس المرة دى


انا كنت باتحرق مع كل خيط نار بيحول كل نقطة لرماد


وقتها حسيت فعلا يعنى ايه البلد دى مش بلدنا


دى بلدهم هم مين ما تسالش لان الجواب هيتعبك اكتر من ما هيشفيك


والله ساعتها اول حاجة جت ف بالى البوليس السياسى


وحسيت اننا قلبنا على الستينات


بس خرجت ف النهايه وقلت ما ينفعش استسلم هيعملوا ايه ؟



مهما عملوا احنا خلاص اتقتلنا واللى كان كان وما يضير الشاه بعد ذبحها


بالعكس انا بعدها اتشحنت نفسيا جدا ضد النظام بصراحة انا لو مكان اخويا كنت هانضم للاخوان عند ف الحكومة


واتاكدت وقتها ان المشكله ان كل حاجة بتتعالج ف البلد دى غلط


الشعب ثاير وهيعمل اضراب خلاص اقطع عيش الكل وانشر ناس تخرب ونقول هما دول بتوع الاضراب شايفين الجماعة اللى بيضربوا وحشين ازاى ؟


الناس بتموت ف طوابير العيش ف الفرن خلاص مفيش موت ف الفرن تانى لان الموت والزحمة بفضل مجهودات حكومتنا الذكيه بقى ف مناطق التوزيع


ايه الاسعار نار والناس كلها من اول الطبقة المتوسطة بقت تحت خط معدومى وليس محدودى الدخل وماله ياعم ارمى لهم 30 % وخدهم من الايد التانيه لما تغلى المواصلات

حتى طريقة اخد القرار نفسه كانت مهزله مسرحيه كوميدية اول مرة اشوف بلد تنفذ قرار قبل ما تدرسه وتحدد موارده

بس زى ما ياما قلت احنا اللى شعب جاحد ومش مقدر المجهودات الفظيعة اللى بتعملها لنا الحكومة

شعب قليل الاصل تهمته انه طالب بحقه


تهمته انه عايز يعيش


تهمته انه عايز يعمل فرق


تهمته انه قليل الادب




معلش يا دك انا طولت عليك وانت بصراحة قلبت علينا المواجع



كفايه كده لاكون متراقبه ولا حاجة



وفعلا انا باحب الحكومة الرشيدة الذكيه النظيفة جدا


واحلى سلام لاكتر بلد ديمقراطى حر


ويسقط الكلام والرغايين اللى زييى



ويحيا ويعيش ويذهر السكوت اللى نافس الذهب جنونا

(او الفول والعدس اكل الطبقة الفقيرة واللى بقى ف العالى )


والسكوت الاغلى من الالماس

(او البصل وطبق السلطة اللى بقى قاصر على عليه القوم )


تقبل مرورى وفائق احترامى


سلام عليكم