ربنا يوفقك يا أحمد في إمتحاناتك وتطلع من الموقعه دي سالم غانم مجبور الخاطر ..
عارف أنا الجو ده كويس ولما ربنا يوقعك في عيل من العيال اللي ما بتغشِّش دي , وكل ما تيجي تبص على ورقته تلاقيه يبقا هاين عليه يقوم يقعد مربع فوق ورقة الإجابه علشان ما تشوفش حاجه , أو يداريها مثلاً مـِنَّك بـ لسان الكوتشي اللي لابسه .
كنت من هواة التنشين يا صديقي زيك بالمللي , يا صابت يا إتنين عور ومذاكره آخر كام ساعه بـ الكاد وكورسات كمان ما أروحهاش وإمتحانات أعمال سنة وشفوي أكسل أنزلها ومشروع التخرج ده ليه حكايه تانيه , هحكيها إنشاء الله .
بس بعد الهزي اللي أخدناه في الكليه واللامبالاه من طرفنا معشر الشباب - البنات عارفين مصلحتهم اكتر في الدراسه - , تخرج تتصدم بـ العالم الخارجي والسوق عايز إيه , بتموت نفسك شغل وكورسات ومذاكره من تاني علشان تعوض الفجوات اللي بيننا عموما كـ عرب وبين الأجانب اللي شغالين في نفس مجالاتنا أو حتى بينك وبين الناس الناجحه , لأن البني آدم الكويس ما بيرضاش المفروض بأنصاف الحلول , يا تكون أحسن حد في مجالك وأنجح حد فيه يا إما هييجي غيرك ياخد مكانك أو هيبقا زيك زي أي حد , والحياه مليانه ناس بين بين .
بس ماشاء الله على أسلوبك في الكتابه متميز جداً والسخريه اللي بتخلي الضحكه تطلع من القلب دي بتقول إنك فعلا ليك مستقبل جامد وإنت أكيد عارف كده كويس وحاسس بيه , طوّر يا أسطى من دلوقتي , وحاول ترشق في حاجه تنمي عندك موهبتك الأدبيه الفظيعه دي .
ربنا يوفقك .
موضوع: للذكرى .. تانى يوم امتحانات .. 8/1/2008 
الخميس 10 أبريل 2008 - 8:51