خايفة اصدق تطلع كدبة ابريل .

من كاااااااااااام يوم كده كنت قريت موضوع عن اضراب عام هيحصل فى مصر يوم 6 ابريل
ولان شهر ابريل مشهوووووووور قوووووووووى بالكدب فالموضوع مخدش منى اهتمام
لكن لما لقيت الرسايل على الايميلات بدأت تكتر بصراحة خدت الموضوع على محمل الجد وبينى وبين نفسى
بتمنى انها متبقاش كدبة ابريل .تعالوا كده نشوف رسالة ايه اللى جتنى على الميل .

إتفقت كافه القوي الوطنية في مصر علي أن يكون يوم الأحد القادم 6 إبريل يوم إضراب عام في مصر يوم 6 إبريل خليك قاعد في البيت أو شاركنا فى الميادين العامة أوعي تنـــــــــزل لكن شاركنا ماتروحشي الشغل ماتروحشي الجامعه ماتروحشي المدرسة ماتفتحشي المحل ماتفتحشي الصيدليه ماتروحشي القسم ماتروحشي المعسكر عايزين مرتبات تعيشنا عايزين نشتغل عايزين تعليم لأولدنا عايزين مواصلات أدمية عايزين مستشفيات تعالجنا عايزين دواء لأطفالنا عايزين قضاء منصف عادل .

مش عايزين أتاوات مش عايزين فساد مش عايزين رشاوي مش عايزين إعتقالات مش عايزين تلفيق قضايا قول لأصاحبك مايروحوش الشغل همه كمان وخليهم يدخلوا الإضراب
( حزب العمل المصري- حركة كفاية - الإخوان المسلمين - حزب الكرامه - حزب الوسط - حركة موظفي الضرائب العقاريه - عمال غزل المحلة - حركة إداريي وعمال القطاع التعليمي – نقابة المحامين - حركة أستاذه الجامعات)

يوم 6أبريـــــــــــــــــل أضراب عام في مصر أبعت رسايل لخمسة من أصحابك ولو كل واحد بعت لخمسة في ظرف يومين البلد كلها حتعرف بالموبايل بالأرضي بالأيميلات أو حتي رسايل عالشات في قنوات التليفزيون أنسخوا رسالتنا وأبعتوها تعليق على كل المقالات ألي بتقروها بيكوا وبينا البلد دي حتتغير أنشاء الله .

دا نص الرسالة اللى وصلنى وبصراحة انا لحد دلوقتى مش مصدقة اننا ممكن نصرخ ونطالب بحقوقنا
انا عايزة اعرف رايكم ايه فى الموضوع دا وياترى فعلا لو فى اضراب حقيقى هتشاركوا فيه
لازم نفتح الموضوع دا للمناقشة ونتكلم فيه شوية ونشوف ايه اللى هيحصل فى يوم 6 ابريل .
تحيـــــــــــــــــــــــــــــــــــــــــــــــــــاتى
فـــــــــــــــــــــــــــــــــــــــــــــــــــــــــــــــلورندا.

اضراااااااااااااااااااااااااااااب

اضراب علي اية ولا علي اية ولا علي

مش عارفة والله يافلورندا

بس بجد الرسالة كلها كلام حقيقي كلام بجد كلام بيحصلل وكلام نفسنا مايحصلش

وانا مش عارفة ياتري الاضراب دا هياثر في حد

من راي

ولا هياثر

كان اثر من زمان

من ايام ماهلينا رفعوا الراية ومش قادرين علي تعليم اولادهم
مش قادرين يلبسوهم زي الناس
مش قادرين ياكلوهم

اضراب اية دا اللي بتتكلموا عنه
انا لو حصل الاضراب دا
لو يوم سبت اتنين اربع هاروح الجامعة
لو حد تلات خميس هاعمل اضراب معاهم

ونكتفي بهذا القدر
علي راي الاخت اية
وشكرا لمناقشتك الموضوع فلورندا
سلام

السلام عليكم ورحمة الله وبركاته

والله انا شخصيا اتمنى ان الاضراب يكون امبارح

ونفسى ف حاجة تصحى بجد وتفوق بجد

وف نفس الوقت مش عارفة ده هيفرق ولا لا

وبعدين هنطالب بايه ولا ايه

احنا كده هنطالب بمصر جديدة

المشكله ان مش ينفع اننا نتكل على حد

عايزين اضراب يبقى يالا
من غير مانستنى حد لاننا شعب متواكل جدا وكل واحد بيستنى التانى يبدا الاول

لازم احنا اللى نعمل بايدينا مش حد تانى يدافع عننا

بس ياترى هل فعلا اضرابنا ده هيعمل حاجة

ياريت

وياريت يكون فيه اضراب بجد

انا عارفة ان ردى ملخبط

يمكن لان مودى الشخصى دلوقتى ملخبط مش عارفة

بس ف الاخر يتريت يكون فيه اضراب

ويكون ليه فايده

مش مولد وهيفضوه بشويه ميه وخلاص

سلامى للجميع

ومعلش يافلور استحملينى

ياما استحملتينى

سلام عليكم

السلام عليكم

يسمع من فمك ربنا يا فلوراندا..... يا ريت والله يحصل الاضراب ده فعلا الشعب تايه والله العظيم الشعب تايه.....
تعالوا شوفوا لقمة العيش بيحصل عليها الشعب ازاي..... آه وآه يا بلد فين أيامك يا سادات....ولا أيامك يا عبده.....يالا هنقول ايه ولا ايه ولا ايه....
ده السد العالي عشان سافر من وراء الأهلي يااااااااااااااااه الدنيا اتهدت ولقوا حاجة تشغل بال الشعب المسكين لكن لا وألف لا.....ده الشعب مكبوت بس لحد امتى ده الحوض المسدود لازم يجيله يوم وينفجر عشان عايز يتسلك أهه لازم الشعب يفووووووووووووووق شوية بس لو انفجر.... ممكن يحصل بلاوي
أتمنى ان الشعب كله بكل طوائفه يعملوا الاضراب ده على الله قلوب اللي بالي تلين
سلاااااااااااااااااااااااااااااااااااام

والله يا جماعه انا اعرف ان الاضراب فى دول تانيه دا حاجه عادى خاااااااالص
بتحصل كل يوم ويوم كده
يعنى بقت حاجه برتكول فى الدوله

بس بالرغم من كده بتجيب نتيجه اوى

هو صحيح موضوع الاضراب دا جديد علينا ومش عارفين عواقبه ايه
بس احنا مجربناش ولو جربنا مش هيحصل حاجه كده او كده خسرانين
على الاقل كسبنا شرف المحاولة

شكرا ليكى فلورندا على اتاحه المناقشه
تقبلى مرورى