مى عبد الرحمن

مى عبد الرحمن ...
مش فاكر كنت باتكلم مع مين قبل كده هنا فى المنتدى .. و كلمته عن مى عبد الرحمن .. و إنها كانت السبب الأساسى و الرئيسى فى إنى عملت بلوج ..و كتبت شعر .. و عشقت الشعر .. عامى و فصيح .. بجميع أغراضه
مى عبد الرحمن غايبة من فترة .. رجعت تانى ... و غابت تانى ..
لكن كل اللى يهمنا منها .. شعرها ..
هاعرض عليكم دلوقتى - و فى أيام تانية كتيرة - أشعارها .. اللى أكيد كلكم هاتحبوها .. و يمكن كمان تعملوا زيى و تحفظوها ..
رحبوا معايا يا جماعة بمى عبد الرحمن .. أو بمعنى أدق .. بأشعار مى عبد الرحمن ..
------------------------------------
أول قصيدة ..... قصاقيص
-------------

أحلام محبوسة بقالها كتير في خيال هلكان
وصور بهتانه علي الجدران
وشراع راجع بحكاوي سنين
وورق وأقلام
وكلام في كلام
قصاقيص مكتوبة بحبر حزين
قصاقيص إنسان
أنا عشرة قديمة مع الأحزان
أنا صورة إترسمت ابيض واسود مش ألوان
و اتسجنت في وشوش الملاييين
أحيانا بعرف نفسي بجد
وكتير بسألني :أنا أطلع مين؟
أنا قشة ساعات تكسرني الريح وتفوتني مفيش
وساعات بتحدي هموم الدنيا ماتكسرنيش
وساعات و ساعات
أنا أصلي كتاب......بقراني كتير ومابفهمنيش
فيه عشق اخترني وما اخترتوش
فيه عشق اخترته ومااخترنيش
سكنوني قلوب وسكنت قلوب
قتلوني كتير وحلفت لاعيش
وظلمت قلوب سامحوني خلاص
وقلوب لسها ماسامحتنيش
من يومها بحاول ألاقى نفسي ومالقيتنيش
أنا تايهه في حزني مع التايهين
ماعرفش بدأت السكة أزاي ولا هوصل فين
اللي أنا عارفاه
أنا قلب عجوز عمره دقيقتين...أقصد عشقين
والعشق التالت مش محسوب ضمن الحواديت
علشان جاي يسكن في ضلوعي من بعد خلاص ما بقيت شخابيط
وبقيت فزورة وشرحي يطول
مع انه في قلبي بقاله سنين عايش علي طول
أصل أنا رسماه من عمر بعيييد...علي آخر صفحه من الكشكول
ساكن في دفاتري بقاله كتير
فارس رحال من حضن حكاية من الأساطير
دورت عليه مع كل رواية من الإتنين كان مش موجود
وقابلته في اّخر مشواري في طريق مسدود
وياريته وصل من قبل ما أموت
من قبل ما أكون ناي من غير صوت
و عروسه ضعيفة علي المسرح سجناها خيوط
وياريته ماجاش...أو حتى فضل صورة في كشكول
أحسن ما يزود للقصاقيص إحساس مقتول
ما هو مش معقول
فارس يعشق حبة قصاقيص
و عروسة خشب من غير أحاسيس
وياريت وياريت
كان اّخر سطر من الحواديت
كان اّخر حلم سكن قصاقيص
واتقفل المسرح ع الحكايات...فركش...خلاويص
أنا لسه بضيع
والدنيا كمان بتعاند غاوية تبيع برخيص
وسألت كتير:مين اللي قتلني ؟ ومين خلاني أكون قصاقيص؟
مين اللي سجنًي في صورة وبهتت في البراويز؟
مين اللي سرقني من الأحلام؟
مين اللي سرق مني الأحاسيس؟
وبقالي كتييييييييير بستني الرد ولسه ماجاش

أنا يظهر ضعت ....ورحت فطيس

انا فعلا اعرف مي واعرف مدونة قصاقيص مشاعر

وفعلا مي كتاباتها وقصائدها رائعة

والقصيدة دي بجد رائعة

كلها رائعة

شكرا لنقلها هنا استاذ احمد

سلام

السلام عليكم ورحمه اله وبركاته

بصراحه انا ما اعرفش

لا مى عبد الرحمن ولا قصائدها

بس بامانه القصيده دى تحفه

عجبتنى قوى قوى

تسلم ايدك يا اسطى

ومشكور على نقلها

سلاااااااااااااااااااااااااااام

خوخة .. و نور ..
تحياتى ليكم و لإهتمامكم بالموضوع .. وز انتظروا المزيد دائما من أشعار الرائعة مى عبد الرحمن ..

فعلاً القصيدة رائعة و بهاا الكثير من المشاعر التي تؤرقني أنا ايضاً

تحية لليد اللي كتبت .. و تحيتين لليد اللي نقلت ...

أهلا بيك يا ابو حميد فى الموضوع .. نورتنا و شرفتنا .. و بجد مبسوط أوى إنها عجبتك ..
يارب دايما منورنى بتعليقاتك ..
تحياتى

مش عارفة اقول ايه بجد غير انى حبيتك فيها وصدقتك
حبيت حتى نبرة صوتى وانا بسمعها منى خلتنى احس بمتعة غريبة معرفش مصدرها
قاقيصك قصننا وصورتك فى ملامحنا وعزفك فى جروحنا
احنا انتى وانتى احنا .
اشكرك يا اسطى على فنك فى الاختيار
وتحياتى للمبدعة مى عبد الرحمن
احلى سلالالالالالالالالام .

ألف شكر ليكى يا فلورندا .. و استنى الجديد دايما .. من مى عبد الرحمن .. و منى أنا كمان ..
تحياتى