الحرية الشخصية ..

أيها الشعب العظيم ... تناولت اليوم رحيق الأزهار حتى أخرج لكم عسل هذا الموضوع لنفتحه للنقاش ...

(( الحرية الشخصية ))

يا جماعة أنا حصل لي موقف شعرت فيه بحزن شديد لعدم تقدير الحرية الشخصية لنفسي .. أنا كنت شاب رايق و فايق ما اعرفش الألف من كوز الدره و طبعاً شغال موسيقى و أفلام و هيافه .. و جبت مجموع معقول و دخلت الكلية .. و فجأة شعرت بسخافتي فقلت تعال يا واد نبحث عن قضيه أو مبدأ للحياة .. و طبعاً كالعادة اتزحلقت في موزة التدين و صاحبت شوية شيوخ كده و ربيت لحيتي و بقيت درويش أخر موضه ... و حفظنا القرأن و بقينا بنصلي قيام اليل كمان ...بس برضه حسيت إني مخنوق .. كل يوم الشيخ يقعد يلعن في ميتين المسيحيين و اليهود و الشيعة و الحكام العرب و الدكاتره و المحاميين و المهندسين .. قلت في نفسي إيه الغباوة إلي أنا بعملها ديه .. أنا طول عمري بحب الكل و ما حبش أبداً طريقة التكفير و كره الأخر لمجرد إنه ( أخر ) .. فحلقت ذقني و لبست كاجوال ( كاشوال على راي البعض ) و رحت الجامعة مطول شعري و بطرقع لبانه .. طبعاً النظرات كانت بتاكلني أكل .. بس الأمر اللي ضربني ضربة قاضية هوه إني سمعت بنتين بيتكلموا مع بعض الحوار التالي ..

- مين الواد اللي هناك ده ؟؟

--إنتي مش عارفاه ؟؟

- لأ

-- ده الود المتدين !!!

يعني إيه يعني هوه الواحد مش من حقه يتغير .. يعني لازم أفضل في صيرورة واحده من يوم الولادة لغاية الممات أفضل اناضل في فكرة واحدة .. هوه مش من حقي اتغير إذا وجدت الأفضل أو إذا وجدت الفكرة تناقض بعض مبادئي ...

أترك ليكم المنبر دلوقتي ... سمعوني الأراء king

اولا انا فى منتهى السعادة انك فتحت موضوع للنقاش علشان كلنا نلاقى فيها طريقة نتواصل مع بعض ونتحاور بيها بدل ما نقعد نخبط فى بعض ونكسر رؤوس بعض وفى الاخر منوصلش لشىء مفيد .
تانى حاجة وبرضه قبل ما ادخل فى الموضوع انا عايزة اقولك انك كان ممكن تطرح الموضوع بطريقة مختلفة عن كده وكانت هتضمن لك جذب اكتر للاعضاء وهو انك تطرح عليهم الموضوع من خلال اسئلة وبعدين تقول وجهة نظرك او سبب الموضوع
ما علينا المهم ان الموضوع انكتب نسيبنا بقى من العرق الصحفى ونقول رايى الشخصى
موضوعك كله يا هيزنبرج بيتلخص فى كلمة صغيرة انت عارفها والناس كلها تعرفها
(وهى ان حريتك بتتوقف عند حرية الاخرين ) طالما انك مش مسيت حرية الاخرين اعمل اللى انت عايزه ومش من حق حد فى الدنيا كلها يقولك انت بتعمل ايه
بس بشرط زى ما قولنا متمسش حرية غيرك واللى انت هتعمله يكون فى اطار ميخرجش عن العادات المؤلفة والقانون والدين يعنى باختصار (ميكنش غلط او عيب او حرام)
انت عارف الكلام ده وفى الحقيقة مش هو دا برضه اللى انا عايزة اقوله
انت ركزت فى موضوعك على نقطة فى منتهى الاهمية وهى ضريبة الحرية المشروعة يعنى انت شايف انك معملتش حاجة غلط فمش من حق حد انه يتريق عليك
هو دا بقى مربط الفرس والنقطة اللى انا عايزة ارغى فيها لو انت قررت التغيير وقبلته وشايف انه صح ولا يتعارض مع شريعة او نص او قانون يبقى استعد انك تواجه المجمتع بمبدئك اى شىء غريب بيكون صعب فى البداية المهم انك تكون مقتنع بنفسك كده حاسس انك مرتاح مش بس عاوز تتغيير علشان منطق خالف تعرف وادينا بنطرقع ....... لا
حاول يكون التغيير مفيد بالنسبة لك ودافع عن نفسك بالشكل اللى يرضيها ومش ياذيها ولا يكره حد فيها .
ولازم تكون قد اللى انت هتعمله وتتحمل نتيجته يعنى مثلا :
يعنى مثلا انا لو قررت بكره انى اخلع حجابى وامشى فى الشارع بهدوم اللى من غير هدوم دى اكيد تعرفها دى حرية شخصية بس ياترى انا هكون قد النتايج بتاعتها
انا مش بس هاذى نفسى بذنوب ومعاصى لا دا كل اللى هيشوفى هيرتكب معصية تخيل انا ممكن اكون السبب فى ضياع كام بنى ادم ودخولهم النار ...
بلاش الدين انا مش فى دماغى الدين خالص ومش فارق معايا الموضوع وعايزة اعيش حياتى ياترى هكون قد نظرات الشهوة اللى هتتبصلى ولا هتضايق ياترى لو وصلت الاثارة بالى قدامى انه يتجهم عليا .. هبقى مبسوطة ولا لا
والعكس صحيح انا لو مش محجبة وعاوزة اتحجب ياترى هقدر اواجه المجتمع ولا لا هقدر استحمل تريقة عليا واللى يقولى لابسة بقى شوال ولا مش عارفة ايه لو مقتنعة مش ههتم حتى لو حد اتهمنى بالتخلف والرجعية المهم انك تكون ثابت على مبدئك ومقتنع بالتغيير ده ومش مهزوز .
يبقى لو عاوز تتغير اى تغير خليك مستعد لنتائجه ولو مش قدها يبقى خليك زى ما انت احسن بدل ما تخسر كتير .
يارب اكون قدرت اوضح لك وجهت نظرى ويارب تكون استحملت صداعى
بس زى ما قلت لك انا رغااااااااااااااااااية
اقولك على فكرة حلوة لو مش عاوز تصدع اكتب على الموضوع ممنوع دخول الراغيين وخلاص .
تحيــــــــــــــــــــــــــــــــــــــــــاتى يييييييييييه اقصد سلاموووووووووووووز lol!

شكراً يا فلورندا على تعليقك الصحفي الجميل .. و فعلاً أنا محتاج بشدة إلى تحسين أسلوب مواضيعي .. سلاموز

احييك يا دكتور علي مناقشتك الموضوع دا

وعايزة اقول لحضرتك علي حاجة ان دا فعلا حصل عندنا برضة
وانا مش هاقولك ماتكلمناش عليه
لاء اتكلمنا بس مش نظام تريقة ولا الكلام دا
لاء دا كنا متعجبين للي عمله واية سبب دا

بس حضرتك فتحت موضوع تاني
ان دي فعلا حرية شخصية
وزي مافلورندا قالت طالما لا تتعارض مع الدين ولا تخالفه
خلاص يبقي انت حر في شخصك

وانا اتمني لحضرتك الخير والسعادة
وربنا يوفقك يارب
واعمل اللي انت عايزه ولا تهتم بكلام حد

سلام

HiZeNbErG كتب:: شكراً يا فلورندا على تعليقك الصحفي الجميل .. و فعلاً أنا محتاج بشدة إلى تحسين أسلوب مواضيعي .. سلاموز

على فكرة طريقتك فى الكتابة بتعجبنى جدااااااا وعمرى ما شدت بحاجة انت كتبتها الا وكنت فعلا مقتنعة بكل كلمة فيها وحساها بجد .
تعليقك ده دليل على انك مفهمتش قصدى من اللى خلانى اعلق على اسلوب كتابة الموضوع ده بالذات وبس
اللى خلانى اقولك كده هو انك فى اول الموضوع قولت انا بفتح موضوع الحرية الشخصية للمناقشة
بس بينى وبينك انا لما قريت الموضوع حسيت غير كده حسيت زى ما يكون موضوع فى مشكلتى
موقف انت اتضايقت منه وعاوز حد يقولك انك كنت صح ويقف جمبك ويخفف المك من الموقف زى ما حسيت من كلامك انك مقتنع تماما ان اللى انت عملته حرية شخصية ليك او يقولك مش حرية شخصية ويعارض كلامك يمكن تفهم منه وجهة نظر البنتين فى الموقف اللى اخدوه منك ده انت كنت مستنى ردة فعل خاصة بيك انت وبس.
فبكده الايه اتقلبت لانك قصرت الموضوع على ان اى حد هيدخل يقول رايه الاول فى مشكلتك (الموقف اللى ضايقك)
وبعد كده لو عاوز يتكلم فى الحرية الشخصية يتكلم .
ولان موضوع الحرية الشخصية ده مهم جداااااااا بجد وهو تقريبا محور حياتنا فى الجامعة وطريقة تكيفنا مع المجتمع الجديد اللى احنا داخلين عليه ومدى تعارضه او قبوله لحريتنا
خلانى استخسر الموضوع الهايل الفظيع التحفة ده فى مجرد موقف شخصى وان كان الموقف مهم جدا بالنسبة لك ومهم جدا انك تعرف اللى عملته ده حرية شخصية ليك ولا لا ..وانا قد ايه مقدرة موقفك ده وبحترمه بس حبيت انى انبهك .
اتمنى انى اكون وضحت الامور الى حد ما واوعى تستقل تانى مرة بنفسك كده لانك بجد كبير وموهوب ورائع ومش انا اللى هقووووووووووولك الكلام ده .
احلى سلالالالالالالام لافضل كاتب مواضيع هادفة ومحسوسة فى المنتدى .

خيرية و فلورندا .. أشكركم... و طبعاً الفعل باعي كان نزوة و مرت أنا إختلفت دلوقتي .. و معلش ما تزعلوش لو أنا ما فهمتش المواضيع أصلي بفهم كل موضوع بالإدراك بتاعي في الساعة ديه و ليس بغرض الكاتب ... يعني كل شيء بحوله إلى تعبير عن ما في نفسي و ليس ما في نفس القدامي .. فما تزعلوش ...

سلاموز

السلام عليكم ورحمة الله وبركاته

اولا يا دك انا باهنيك ع فتح موضوع الحريه الشخصية وان كان من خلال موقف ما

لان انا اكتر حاجة غايظانى ف الجامعة وبالذات بين البنات والولاد الحمد لله اتعدوا

هى

التريقة على خلق الله

مش سايبين حد ف حاله مهما كان عامل

ومن هنا توصلت لنظريه هامة
ام الناس لو ما لقيتش حد تتكلم عليه هتنم ع نفسها

وصدقنى مفيش حد عاجبه حد

وزى ما فلور قالت اهم حاجة انك تكون مقتنع باللى بتعمله ومستعد انك تدافع عنه

وانا مش عارفة لو ضربت مثل كده ابقى باحول الموضوع ده ولا لا

بس انا شخصيا من النوع ده يعنى لى افكارى كدة

بس بلاش تسييح عشان منظرى العام ف المنتدى

بس صحابى اللى ع المنتدى عارفيين

والحمد لله انا ضاربه طناش تماما للى يقول كلمة كده ولا كده

اللى عايز يتكلم هيتكلم حتى لو عملت له ايه

وبالتالى انا باعمل اللى يريحنى

اللى يريحنى وبس طالما مش باعمل حاجة غلط

ومقتنعة باللى باعمله

يالا بقة كفايه كدة عشان طولت

معلش انت ربنا واعدك باتنين رغاييييييييين موووووووووووت

سلام عليكم

اولا كلام فلورندا وخوخة وجورناليست

كلام جااااااااااااااااااامد جدا ومفيهوش اى اعتراض
واعتقد انى لو اتكلمت هقول نفس الكلام

بس هو سؤال يا هايزنبرج

لو انا شوفت حد اتريق عليا اكيد هتسأل بينى وبين نفسى ايه المش طبيعى عشان كده لفت الانتباه

مهو بصراحه مش معنى انى مهما عملت ايه مش بيرضى الناس وكده او كده هيتريقوا
يبقا امشى باسلوب غير طبيعى
اصل التغير 360 درجه من حاجه لحاجه دى فى حد ذاتها بتلفت الانتباه
عارف هما مش هيقولوا عليك وااااااااو سبحان مغير الاحوال او كده
لاء هما هيقولوا مثلا انك متزعزع منين ملتزم ومنين عايش الدنيا بكل ما فيها

بص عشان كلامى مياخودش اتجاه تانى فانا مقصدش انى بقيد اللى بيتريقوا
بس بقول اى حد عمتا لما بيعلق على حاجه اكيد بتبقا حاجه غير طبيعيه سواء صح بقا او غلط بس غير طبيعيه

انا مبقولش متتغيرش ولا بقولك خليك زى ما انت بس بقول ان التغيير بأى طريقه سواء للاحسن او للاوحش امفروض انه يبقا بالتدريج عشان لو هيبقا تغيير للاحسن مترجعش تانى فى كلامك بسرعه ولو تغيير للاوحش تبقا ادامك فرصه تفكر فى الافضل

وبالطريقه دى تبقا ولا حد اتريق عليك ولا انت مشيت طريق غلط

ياااااااااارب تكون وجهه نظرى وصلت

وشكرا على الموضوع الجامد يا هايزنبرج واسمحلى انضم لحزب الرغايين
بس انت قولت نقاش استحمل بقا هههههههه