خليك فى حالك

هو انت لسه بتبتسم ..؟

طب قوللى ليه ؟

عايش حياتك فى انسجام ؟

مرتاح و أحوالك تمام ؟

طب لو سمحت ..

خلينى أبوظ فرحتك ..

إسمع .. ماتقطعشى الكلام ..

أحوالنا يا صاحبى العزيز ..

رجعت لعهد الإنجليز ..

يمكن كمان أسوأ كتير ..

عبر برأيك فى إجتماع ..

إكتب عن الزيف و الخداع ..

عمرك ماهاتشوف الشعاع ..

هاتروح ورا الشمس فى ثوانى ..

ماتقولشى ليه ..

أصلك ذكرت كلام كبير ..

قومها فى دماغ الجياع ..

لازم تعيش جوا السجون ..

و مافيش أمل ..

خليك فى حالك يا بطل ..

أصل البلد دى خلاص بقت زى الوسية ..

باعوا القضية ..

جوا البنوك مليون عمولة و ألف جيب ..

قافشين على فلوس الغلابة المطحونين ..

و بنوك سويسرا بقت بتصرف بالجنيه ..

ماتقولشى ليه ..

إياك تفكر يوم تثور ..

فى بلدنا بيحاسبوا الجنين ...

فى بلدنا بيحاربوا العمالة ..

أما البطالة فى إزدياد ..

فتحوا المزاد ..

باعوا المصانع و المزارع و البنوك ..

حاسب يا صاحبى لايبيعوك ..

لأ ماتحاسبشى ..

هو انت يعنى تسوى إيه ؟

حبة كلام و هدوم عليه ..

باقولك إيه ؟

مالاقيش معاك حبة دموع ..؟

أصل الدموع عندى انتهت ..

من كتر أيامى الى فيها عطش و جوع ..

خليك فى حالك ...

إياك تفكر فى إنقلاب ..

هو انت مين ؟

مانتاش عرابى و لا الزعيم ..

مانتاش حسام ولا عب حليم..

إنت الفقير إبن الفقير ..

من قلب واقعنا الاليم ..

مظلوم ... و فى غيرك كتير ..

جوا الوطن.. لكن أسير ..

خليك أسير ..

أصل الكلام مابقاش يفيد ..

ولا حتى أحلام البطولة بقت تفيد ..

الناس خلاص صابها الخمول ..

متقبلين المشكلة من غير ذهول ..

راميين عليه كل الحمول ..

قادر كريم .. عالم رحيم ..

بين يوم و ليلة يغير الأحوال ..

و نرجع للنعيم ..

سيبها على ربك يا صاحبى و عيش سليم ..

خايف عليك من سين و جيم ..

عد العساكر هاتلاقيهم قد شعبك مرتين ..

قادرين عليك لو روحت فين ..

إدعى معايا و قول آمين..

يارب عالم بالقلوب .. إنت المتين .

قادر ترد الظالمين ..

قادر تنجى المظلومين ..

قادر تطيب جرح كل المجروحين ..

ماتقول آمين ..

قصيدة هايلة يا جناب الأسطى

بس يا ترى تزعل مني لو قلت ليك إن سبب تأخر البلد مش الحكومة و لا الحزب الوطني و لا حتى الفساد و الرشوة .. سببها هوه الناس الفقرة اللي زينا كده ...

أنا مثلاً أقدر اتقبل إن بلد زي فرنسا أو أمريكا فيها بطالة علشان متقدمين و عندهم مكائن و تكنولوجيا يعني مفيش مكان إلا للأقوى .. لكن بلدنا لسه محتاجه كثير ديه حتى محتاجه شعب أكثر من 80 مليون علشان يشتغل .. يعني بدل ما نقول يا رب في قصيده نقوم نشتغل و نقول يا رب في الحقل و المصنع بس إحنا بنحب الكسل و النووووووووووووم ...

afro

أهديك هذه المقولة الإنجليزية الحكيمة (( ما يؤمن به إثنان يتحقق )) .. أنا أول مؤمن و خليك إنت الثاني علشان يتحقق يا أسطى ... ثانكس

كلامك منطقى و موزون يا أخ هايزنبرج ..
لكن هل الإيمان لوحده بيحقق الصعاب ..؟ ماعتقدشى
حتى لو كانوا المؤمنين ألف .. مش اتنين بس
لكن تكفينا المحاولة ..
تحياتى ليك

رااااااااااااااائعة جدااااااااا وهايلة وجميلة قووووووووووى .
بجد عجبتنى وفعلا حسيتها وقد ايه احساس الصدق فيها عالى قوى
اشكرك انك قدرت تعبر عننا وتتكلم بلسانا بس دا اكيد علشان انت مننا حاسس بألمنا وعذابنا وجرحنا ربنا يديم عليك نعمة ربنا وتفضل تكتب وتكتب يمكن فى يوم تنصلح الاحوال ونقدر نتغير كلنا .
احلى سلالالالالالالالالام للاسطى .
تقبل مرورى وتحياتى.

السلام عليكم

فعلا يا فلور فيها احساس صادق

وقدر يعبر عن اللى جوانا بلسانه

وتسلم ايدك يا اسطى بجد رائع

احلى سلالالالالالالالالالالالالالالالالالالالالالالالالالالام للاسطى

فلورندا .. إنجى ..
تحياتى ليكم انتم الاتنين على تعليقاتكم المشجعة و أنا قليل أى لما باكتب فى المواضيع العامة أو السياسية لأنى باحس إن كلامى مافيش منه رجا .. كلام فى الهوا مالوش أى لازمة ..
يمكن تكونوا شايفينه مفيد .. لكن أى إستفادة ..؟ بالعكس .ز دجا بيفكرنا بالغلب و العذاب و يزود ألمنا و بالتالى بيضرنا ..
خلونا نفكر من منظور شخصى شوية ..
ملعون أبو البلد و اللى فى البلد ألف مرة

اقتباس :: هو انت يعنى تسوى إيه ؟
حبة كلام و هدوم عليه ..

ايه الحلاوة دي يا اسطي
شعر وسياسي كمان
تسلم الايادي يا مان
وربنا يزيدك كمان وكمان
وتشجينا بكلام اللسان

سلام

{بنا يخليكى يا حنان يارب .. نورتينى و نورتى الموضوع ..
تحياتى ليكى

» ودا حالك يادنيا...