لسه فاكر

لسه فاكر كل لحظة ..

كل ذكرى ..

كل ضحكة ..

كل كلمة قلتيهالى ..

كل مشوار كنا فيه ..

كل حلم حلمنا بيه ..

كل رنة ..

كام رسالة بعتيهالى ..

إنت وش الخير عليا ..

إنت أقرب شخص ليا ..

يوم و يوم .. الساعة عشرة ..

أتصل .. تتصلى بيا ..

نتفق .. و معادنا بكرة ..

بكرة نتقابل و نفطر ..

مش بعيد نحضر محاضرة ..

فى المدرج ..

كنا بنفكر فى فكرة ..

فكرة مش ممكن يفكر غيرنا فيها..

كلها جنون و استحالة ..

فاكرة جمعية رسالة ..؟

فاكرة سينما أحمد عرابى ..؟

لما كنتى بتسألينى ..

إمتى ندخل فيلم حلمى ..؟

أو كريم عبد لعزيز ..

فاكرة طعم الكشرى بالشطة اللذيذ ..؟

فاكرة معلقة الجيلاتى.. فى عز حر الصيف و ناره ؟

بس فجأة .. غيبتى عنى ..

و القمر فارق مداره ..

و النجوم الى فى سمايا

أعلنوا العصيان .. و ثاروا

فاكرة نظرات العينين ..

ولا لمسات الإيدين ..

و اما كنتى بتوحشينى ..

و احنا لسه مروحين ..

كنت حاسس إنى منك ..

و إنتى منى .. من سنين ..

و اما جيتى تغيبى عنى ..

يوم فراقك كان حزين ..

كنت زى الزرع لما يحين ميعاده ..

بعد ما ارتاح وسط أرضه ....

و خد عليها ..

هايفارقها يوم حصاده ..

مش ها يرجع تانى ليها ..

فاكرة نظراتنا البريئة ..؟

كنا بنقول بالعيون .. ألف كلمة فى الدقيقة ..

لما نبعد ..

كنت دايما حاسس إنك بتنادينى فى الغياب ..

و افتكر نظرات عنيكى لما أقلب فى الكتاب ..

فاكرة مشوار العذاب ..؟

مالزراعة .. للمحطة .. لباب آداب ..

أعذرينى .. طال كلامى ..

غصب عنى ..

أصلى حاسس باكتئاب ..

صدقينى

هاتوحشبنى