احمد فواد نجم

من فؤاد نجم الى الريس مبارك(شعر رهيب)

سيدي الرئيس

في عيد ميلادك الكام وسبعين

كل سنة وأنت طيب

واحنا مش طيبين[
كل سنة وأنت حاكم

واحنا محكومين

واحنا مظلومين

واحنا متهانين

ويا ترى يا حبيب الملايين

فاكرنا ولا احنا خلاص منسيين

فاكر المعتقلين

فاكر الجعانين

فاكر المشردين

فاكر اللي ماتو محروقين

فاكر الغرقانين

الله يكون في عونك - هاتفتكر مين وللا مين

في عيد ميلادك الكام وسبعين

بقول لك كلمتين

الأوله

شيلتنا طين

وهل تعلم أن النيل بقى رشاح

والجو أصبح بيئة والعيشة ولعة

والشرفا قلوبهم عالبلد والعة

وانت عاملهم مذبحة ولا بتاعة القلعة

والاقتصاد سداح

والسرقة بقت كفاح

ومصر متاحة بس للسياح

وعرض البلد بقى مستباح

والتانية

ورتنا الويل

دا الخطوة في عهدك بقت ميل

والضحك بقى نواح وعويل

والكوسة

عارف الكوسة

ممكن أقولك فيها موواويل

والجامعة بقت يا إما كباريه أو دار مسنين

والشباب معظمهم من غير خمرة سكرانين

والعلم عز على المتعلمين

والأساتذة بقم دجالين

والقادة بقم طبالين

واديني في الهايف يا حبيب الملايين

والتالتة

عارف اليابانيين

زمان في سنة اتنين وخمسين

كان عندنا تروماي وكان عندنا علم ومتعلمين

وثقافة ومثقفين

وأدبا وعلما وفنانين

وكانو اليابانيين

بالنووي لسة مضروبين

وللصدقة مستحقين

دلوقتي إحنا فين وهما فين

هما فوق واحنا في أسفل سافلين

والرابعة

أمن البلد بقى تنين

والمحاكم اتملت مظالم

والعدالة بقت كمالة

وكلمة الحق في الزبالة

وأصحابها في الزنازين

والخامسة

القطاع العام…. عام

والفساد…. ساد

وفي جتة بلدنا بيرعى

أفتكر لجنابك إيه وللا إيه

وكل ذكرى ليك بدمعة

آآآآآآآآه آآآآآآآآه

أنا كنت حالف ميت يمين

أكملهم لك تمنية وسبعين

بس هاكفيهم ورق منين

وكل سنة وأنت

واحنا طيبين

جميله جدا يا مان

بس نحب نعرف الاسم عشان نبقي ناديك وترد

مش نقلك يا بس وتعال يا بس

بس فعلا كلام حلو قوي

رغم اني قريته قبل كده

بس بحب اقراها كتير

تسلم مجايبك يا مان

السلام عليكم
اجمل حاجه في القصيده انها بتشمل معظم المساويء الموجوده في مصر

والمشكلات وقضايا العصر اللي احنا بنعيشها

بس انت بتهنيء الرئيس ولا بتنكد عليه

هو لما حد بيقول لحد هابي بيرث ديي

يفضل يفكره بالهموم اللي شغلاه ولاحتي مش شغلاه بس ده عيد ميلاده ياجماعه حرااام

مش كنت تجيبله تورته شيكولاته ولا ورده

يعني ياشوتر براحه عليه احسن يتعب وانت عارف بقي ده عنده حاجه وسبعين يعني

مش اد الهم ده كله هههههههههه

عموما شكرا عالقصيده الحلوه دي سلاااااااام

جمييييييييييييلة

فعلا اللي كتب القصيدة دي

بجد مبدع

لان كلماتها فعلا

تودي في داهية

شكرا يا شوتر علي نقل القصيدة دي هنا

سلام
وكلسنة وانت طيب يا سيادة الريس
وعقباليارب 3000 سنة
ومن قلبي

ياشعبي حبيبي ياروحي يابيبي ياحاطك في جيبي يابن الحلال

ياشعبي ياشاطر ياجابر خواطر ياساكن مقابر وصابر وعال

ياواكل سمومك يابايع هدومك ياحامل همومك وشايل جبال

ياشعبي اللي نايم وسارح وهايم وفي الفقر عايم وحاله ده حال

احبك محشش مفرفش مطنش ودايخ مدروخ واخر انسطال

احبك مكبر دماغك مخدر ممشي امورك كده باتكال

واحب اللي ينصب واحب اللي يكدب واحب اللي ينهب ويسرق تلال

واحب اللي شايف وعارف وخايف وبالع لسانه وكاتم ماقال

واحب اللي قافل عيونه المغفل واحب البهايم واحب البغال

واحب اللي راضي واحب اللي فاضي واحب اللي عايز يربي العيال

واحب اللي يائس واحب اللي بائس واحب اللي محبط وشايف محال

واحبك تسافر وتبعد تهاجر و تبعت فلوسك دولار او ريال

واحبك تطبل تهلل تهبل عشان مطش كوره وفيلم ومقال

واحبك تأيد تعضض تمجد توافق تنافق وتلحس نعال

تحضر نشادر تجمع كوادر تلمع تقمع تظبط مجال

لكن لو تفكر تخطط تقرر تشغلي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

وعايز تنور وعايز تطور وتعمللي روحك مفرد رجال

ساعتها حجيبك لايمكن اسيبك وراح تبقى عبره وتصبح مثال

حبهدل جنابك واذل اللي جابك وحيكون عذابك ده فوق الاحتمال

وامرمط سعادتك واهزأ سيادتك واخلي كرامتك في حالة هزال

وتلبس قضيه وتصبح رزيه وباقي حياتك تعيش في انعزال

حتقبل ححبك حترفض حلبك حتطلع حتنزل حجيبلك جمااااال

واحد اتنين الجيش العربي فين

الجيش العربي في مصر
ساكن في مدينة نصر
بيصحى من النوم العصر
وبيفطر شاي و منين
واحد اتنين الجيش العربي فين
الجيش العربي في سوريا
حالق عالموضة كابوريا
وعلى طريقة فكتوريا
خلّى الترماي بدورين
واحد اتنين الجيش العربي فين
الجيش العربي الليبي
زيّ الفن التكعيبي
كله بتنجان يا حبيبي
و الظاهر واخد عين
واحد اتنين الجيش العربي فين
الجيش العربي خليجي
ما فيه حيل لا يروح ولا ييجي
هذا صمت استراتيجي
ايش فيك يا غراب البين
واحد اتنين الجيش العربي فين
الجيش العربي في تونس
اخضر مثل البقدونس
وعزيزة بتعشق يونس
تبقى الحروبات بعدين
واحد اتنين الجيش العربي فين
الجيش العربي سوداني
سامع رنّته بوداني
هو انا هاهجم فرداني
يالا ارجع يا ابو حسين

واحد اتنين الجيش العربي فين
الجيش العربي اتهان
يوم ما انضربوا الأفغان
وسكت في البوسنة زمان
و قبل ياكل بالدين
واحد اتنين الجيش العربي فين

[size=18]السلام عليكم

مش عارفه ياشوتر

حسه ان امن الدوله هييجي قريب يقبض عالمنتدي ليه

براحه شويه علي سيادة الريس

ده برده ليه انجازات عظيمه وعهده شهد تقدم كبير وحفاظ علي مصرمن حاله حرب

بس بجد حلوه اوي القصيده دي ههههههههههههه

تودي في داهيه

واحلي يبيت الاخير ده:

حتقبل ححبك حترفض حلبك حتطلع حتنزل حجيبلك جمااااال

فظييييييييييييييع

ده جمال غلبان وبيعمل مشاريع حلوه اليومين دول

اما قصيده العرب دي حلوه جدا

فعلا العرب في حالة خمول بما فيهم مصر

شكرا عالقصايد الفظيعه دي

سلاااااااااااااااام[/size]